Los Indians de Tolosa (grop ultra del Club de Fotbòl de Tolosa) despleguèron una bandieròla en occitan a l’escasença de la darrièra partida del campionat de Liga 1 contra Montpelhièr dimenge passat. Mentre que los jogaires intravan sul pelenc (al son del Se Canta, imne oficial del CFT), los Indians de Tolosa levèron una brava bandieròla: “Per Tolosa totjorn mai”. D’unes dison que seriá la devisa de la Ciutat Mondina.
Çò segur, es pas lo primièr còp que los Indians de Tolosa fan d’animacions en emplegant la lenga nòstra. Ja o faguèron per exemple contra Bordèu amb un messatge l’an passat: “Garona es violeta e o demorarà” (e darrièr la bandieròla, de centenats de cartons amb la crotz occitana). Los Indians de Tolosa ja an fait qualques eissarpas en occitan: “Per Tolosa totjorn mai” o encara “Tolosa sèm nautres”. Dos professors organizèron de talhièrs de lengadocian e de gascon i a dos ans (se debanavan al local de l’associacion).
Tot còp, cal precisar que d’autres grops ultras en Occitània utilizan la lenga nòstra coma mejan d’expression dins las tribunas de fotbòl: a Bordèu, Montpelhièr, Marselha e sustot a Niça amb la Brigada Sud. Aquel fenomèn existís un bricon mens al rugbi pr’amor que los grops d’afogats son mens organizats. I a pas de vertadièrs grops ultras coma al fotbòl.
La sason 2012-2013 foguèt tanben la dels 20 ans d’existéncia dels Indians de Tolosa. Los resultats del CFT ajudèron pas lo public a venir d’un biais nombrós a l’Estadium. Una sason mejana pel CFT qu’acaba a la desena plaça: 13 victòrias, 12 resultats d’egalitat, 13 desfaitas. L’ambient foguèt alavetz de mal botar dins las tribunas e mai que mai dins la virada Brice Taton (virada que pòrta lo nom d’aquel sòci dels Indians de Tolosa que foguèt assassinat a Belgrad lo 29 de setembre de 2009).
Los 20 ans dels Indians de Tolosa foguèron festejats mai d’un còp dins la sason: contra lo PSG lo 1r de febrièr passat (amb una desfaita 4 a 0, çò qu’empachèt pas los Indians de Tolosa de cantar fins al cap de la partida), a Roazhon lo 10 de febrièr passat e fin finala contra Montpelhièr dimenge passat. Un concèrt se faguèt tanben la setmana passada: concèrt dels 20 ans a la Dinamo de Tolosa amb Skarface, The Branlarians e Ska Fever.
Giraud Delbés
| IT 93
| GD
Etiquetas
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Una causa que m'agrada : "Aquel fenomèn existís un bricon mens al rugbi pr’amor que los grops d’afogats son mens organizats. I a pas de vertadièrs grops ultras coma al fotbòl."
Mai cresiau bonament que lo rugby èra l'espòrt dau pòble occitan e que representava son identitat pregonda ! :nèsci:
S'i botèssen los afogats de rugbi a desplegar de bandieròlas aital, en mai del fotbòl, la comuna mondina se bolegariá encara mai per l'occitan.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Una causa que m'agrada : "Aquel fenomèn existís un bricon mens al rugbi pr’amor que los grops d’afogats son mens organizats. I a pas de vertadièrs grops ultras coma al fotbòl."
Mai cresiau bonament que lo rugby èra l'espòrt dau pòble occitan e que representava son identitat pregonda ! :nèsci:
#2 Es la devisa de la ciutat de Tolosa, tot simplament. Se volias trollejar sus lo nivèu de lenga deis ultras tolosan aqui, sias mau partit.
Es atau que's dit a Tolosa ? "Mai" o "totjorn" ?
S'i botèssen los afogats de rugbi a desplegar de bandieròlas aital, en mai del fotbòl, la comuna mondina se bolegariá encara mai per l'occitan.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari