Ièr a 9h30 del matin, un quinzenat de representants d’entitats culturalas e de grops politics de Catalonha Nòrd ocupèron l’Ostal de la Generalitat de Catalonha a Perpinhan, en protèsta pel licenciament dels correspondents de TV3, la television de Catalonha, en Catalonha Nòrd. Los manifestants placèron una bandieròla a la faciada de la bastissa que ditz “Volèm gardar los correspondents de TV3”.

Qualques sòcis destacats d’entitats e de partits politics, coma Arrels, la Bressola, lo Collectiu dels Professors de Catalan pels Adultes, la Federacion e Unitat Catalana, intrèron qualques minutas après 9h del matin dins la bastissa, plaçada al centre de Perpinhan, amb l’intencion de parlar amb qualque responsable de la Corporacion Catalana dels Mèdias —l’organisme que regís TV3— e li demandar dirèctament lo restabliment de la delegacion de TV3 en Catalonha Nòrd, qu’emplegava sonque doas personas e qu’es estada retirada a causa de las reduccions budgetàrias.
 
Dins un manifèst, la seissantena d’entitats ligadas a la Federacion per la Defensa de la Lenga e la Cultura Catalanas diguèron que comprenon pas que “per de rasons economicas (lo còst d’aquela pichona delegacion arriba pas als 100 000 èuros annals) e encara mens per de rasons politicas, la Television de Catalonha prescindisca d’una delegacion extrèmament simbolica e fòrça professionala just quand Catalonha inícia un procès istoric e nacional qu’a de besonh d’una comunicacion excellenta dins e fòra l’actuala comunautat autonòma”.