Segon Rose Frayssinet, co-presidenta de l'associacion ecologista les Amis de la Terre, las demandas de permes d'espleitacion per un sit estirat entre sud de Perigòrd e Bigòrra (véder carta) serén suu punt d'estar validadas per la Direccion Regionala de l'Environament, de l'Amainatjament e de l'Alotjament (DREAL). Peu sit de Caors, manca pas mei que la signatura deu ministri.

 

L'instruccion miada per l'institucion regionala dempuish la fin de març portava sus mantun punts: legalitat de la demanda (en tenir compte de l'interdiccion de la tecnica dita de fracturacion idraulica), credibilitat tecnica de l'enterpresa, credibilitat financèira. Un còp validat per la DREAL, lo dorsèir serà transmes au prefècte de Nauta Garona, que decidirà o non de'u mandar au ministeri. L'Estat causirà finalament d'aviar lo projècte o pas.

 

Lo cas deu sit de Caors es hòrt mei avançat uèi-lo-dia. Tots los grads preliminaris son ja estats passats, e lo dorsèir espera pas mei que l'acòrd deu ministri en carga per estar definitivament validat. Pasmens, la situacion politica actuala dens l'Estat francés complica l'ahar : la ministri de l'ecologia (Nathalie Kosciuzko-Morizet) a quitat son pòste per gavidar la campanha de Nicolas Sarkozy. Daubuns cranhen que validin los projèctes lèu-lèu, a l'estujada, avant las resultas deu segond torn de l'eleccion. D'autant qu'Estat com DREAL ne comunican pas briga sus aqueth tèma.

 

Lo sit web Vigilance Perigord exprimís sons dobtes quand a la legalitat deu projècte. De hèit, si tota fracturacion idraulica es enebida peu moment, lo collectiu cita un extracte de la demanda de permès de Bèumont de Lomanha: "per produsir gas de quist, es important d'espetar los argilis saturats que'u contenen, dab gets d'aiga jos pression e, quand l'aiga aten la susfàcia, de la desbaratar deus ions poluits que pòrta". Una definicion que correspond exactament, shens ic confessar, a la tecnica enebida de fracturacion idraulica.

 

Un an après la pareishuda de l'estudi Bilan Toxicologique et Chimique: l'exploration et l'exploitation des huiles et gaz de schiste deu scientific André Picot, que denonciava los riscs estacats a la produccion de gas, lo debat contunha. Hòra de l'agitacion politica electorala e lunh deus grands hucs mediatics, totun, maugrat los enjòcs importants qu'i son ligats. 

Pèir-Joan Masdiset