La Vie d’Adèle (La Vida d’Adèla), lo filme ganhant de la Palma d’Aur al Festenal de Canas (Vencenc), a portat fòrça polemicas. D’un costat los activistas omofòbs de l’estat francés planhon que s’agisca d’una istòria d’amor entre doas gojatas. D’un autre costat Julie Maroh, l’autora de la benda dessenhada originala, tanplan a exprimit de planhs. Pasmens cal soslinhar los planhs dels tecnicians qu’an fach publicas las marridas condicions del rodatge.

Lo filme del director occitan e tunisian Abd Al Atif Kashish (o Abdellatif Kechiche segon la transcripcion francesa) conten de longas scènas de sèxe explicit entre Léa Seydoux e Adèle Exarchopoulos, e es arribat en un moment que la legalizacion dels maridatges omosexuals a descadenat de protèstas iradas e violentas de la glèisa e de la drecha. Mas al delà de las protèstas omofòbas dels intolerants, La Vie d’Adèle a menat de polemicas totalament inesperadas.
 
 
De planhs sus la condicions de trabalh
 
Lo filme foguèt rodat pendent cinc meses, e mai s’èra previst de lo rodar en dos meses, segon un comunicat del Sindicat dels Tecnicians e Obrièrs del Cinèma e de l’Audiovisual (Spiac-CGT) publicat lo 23 de mai passat, en coïncidissent amb la presentacion del filme a Canas. Lo comunicat publica de faiçon anonima los planhs de divèrses emplegats que denóncian “de jornadas de trabalh de 16 oras, declaradas 8”. Sus qualques pòstes i auriá “de jornadas de trabalh d’11 oras pagadas a 100 èuros bruts, del temps que 100 èuros nets èran estats promeses”. Se parla tanben d’“oraris de trabalh anarquics o modificats al darrièr moment” amb “convocacion per telefòn pendent los jorns de repaus o pendent la nuèch, modificacion del plan de trabalh del jorn a la jornada. [...] Lo mond sabián pas divendres de ser se trabalharián lo dissabte e lo dimenge seguents”. Se parla tanben de pressions psicologicas. Qualques emplegats aurián quitat lor emplec.
 
 
L’autora de la BD se’n desmarca
 
Julie Maroh, autora de Le bleu est une couleur chaude(Lo Blau Es una Color Cauda), la benda dessenhada que lo filme se basa dessús, a exprimit tanben sas objeccions dins un long comunicat ont esclarzís que lo filme e la benda dessenhada presentan de visions fòrça desparièras, “benlèu complementàrias”.
 
Maroh o planh coma autora de la benda dessenhada mas tanben coma lesbiana. Segon ela, la manca de lesbianas dins la còla de las scènas de sèxe las a fachas “pornograficas”, amb de “fantasiás per òmes”, e doncas “pauc cresablas e gaireben ridiculas”.
 
Ça que la, Maroh exprimís son respècte prigond per la meritada Palma d’Aur de Kashish, “e mai se presenta una vision fòrça desparièra de la de la benda dessenhada originala”.