França s’es decidida a crompar de drònes, es a dire d’avions sens pilòt, als Estats Units e a Israèl, los dos païses qu’a l’ora d’ara fabrican aquel tipe d’aparelhs. Dins un article publicat a Les Échos, lo ministre de la Defensa, Jean-Yves Le Drian, a anonciat que lo govèrn francés visa d’incorporar progressivament de drònes dins son armada de l’aire, amb la tòca de remplaçar totes los caças bombardièrs en 2030.
 
“Nos cal agir amassa, amb los sòcis europèus, per engatjar las nòstras indústrias en la mesa en marcha de drònes pels nòstres besonhs pròpris”, çò ditz Le Drian dins aquel article. Lo ministre apond qu’a tèrme long los drònes finiràn que “completaràn o quitament remplaçaràn las nòstras flòtas de caças bombardièrs a l’orizont de 2030”.
 
Jean-Yves Le Drian reconeis qu’a contactat los Estats Units e Israèl per poder crompar aqueles aparelhs “de faiçon immediata”.
 
“França deu aver de drònes de vigilància per menar a tèrme sas operacions, protegir los sieus militars, los ajudar a contrarotlar de grands espacis e empedir d’eventuals atacs enemics”, çò declarèt lo ministre francés de la Defensa, qu’admetèt que la situacion en Sahèl a obligat lo govèrn de François Hollande de crompar d’aparelhs dels modèls Heron-TP israelian e Reaper nòrd-american. Segon Le Drian, es la fabrica dels Estats Units, probable, que farà lo primièr liurament de drònes a la fin de l’annada.