Un primièr assag de recuperacion d’energia produsida per de veïculs en circulacion se realizarà al començament d’aqueste mes de junh, amb l’insercion dins la cauçada de captadors e de generadors. L’energia nòva se crearà mercés als passatges dels veïculs e s’emmagazinarà dins de batariás qu’alimentaràn, sustot, un panèl de senhalizacion e un esclairatge de seguretat.
 
Es un procediment desvolopat per la societat Green Heart Monaco, especializada dins aquela nòva tecnologia, que permet de transformar los desplaçaments en fonts d’energia neta e renovelabla.
 
Aquel experiment, que se mena en cooperacion amb la Direccion de l’Amainatjament Urban e que recep lo sosten de la Fondacion Prince Albèrt II de Mónegue, se realizarà sus l’Avenguda Princessa Gràcia, sus una porcion d’un vintenat de mètres davant lo Musèu Nacional, e dins l’encastre de la refeccion dels revestiments, los 5 e 6 junh que venon.
 
Alavetz, dimècres que ven, tre 21h00, l’avenguda se barrarà a tota circulacion dins lo sens de Ròcabruna cap a Mónegue, entre lo Carrieron Emmanuel Gonzales e lo Giratòri del Portier. Lo darrièr autobús passarà a 21h05. Lo Carrieron Sant Joan se barrarà a la circulacion dins la nuèch del 6 al 7 de junh.