Aperaquí un milièr de personas manifestèron dissabte de ser a Marselha contra la violéncia, a la crida del Collectiu del 1r de Junh, una organizacion d’abitants dels Quartièrs Nòrd que se constituiguèt en febrièr passat après l’assassinat de qualques joves sus fons de trafec de dròga.
 
La marcha se debanèt tre 15 oras darrièr doas largas bandieròlas que proclamavan “Collectiu dau 1r de Junh: còntra lei violéncias” e “Quartiers populars, siam marselhés, egalitat de drechs e de tractaments per totei e pertot”. Los manifestants brandissián d’afichas amb los noms de las diferentas ciutats e quartièrs del nòrd de la Ciutat Focèa del temps que lançavan d’eslogans coma “Un futur per totei nòstreis enfants”, “Seguretat dins lei nòstrei collègis” o “Egalitat per totei”. Demest los manifestants i aviá de nombrosas maires de familha.
 
En mai de protestar contra las violéncias, lo Collectiu del 1r de Junh planh l’inegalitat de dreches e exigís l’estat de drech dins lors quartièrs, en tot ne denonciar l’abandonament. Demandan que la polícia i siá per los protegir e non pas per los embarrar en preson. Son de ciutadans responsables e reclaman d’èsser tractats coma tals, pas coma de victimas ni coma de complices.
 
“Es una primiera dempuei trenta ans”, çò diguèt a l’AFP Patrick Cassina, un dels organizaires de la protèsta.
 
Lo Collectiu del 1r de Junh balhèt a la prefectura del departament de las Bocas de Ròse una lista de 23 proposicions. De fach lo collectiu desira venir “una fòrça de proposicions”. Tanplan a lançat una peticion en linha per dire non a la violéncia e per combatre l’estigamizacion dels abitants dels Quartièrs Nòrd de Marselha.