Tension en Turquia après que l’urbanizacion d’un pargue a Istambol, amb la repression per la polícia de las gents que manifestavan per gardar lo pargue, ajan desencadenat una ondada de protèstas que s’escampa per mantas vilas. Lo bilanç es d’aperaquí mila detenguts e son ja mai de 90 las mobilizacions per tot lo país, segon de fonts del govèrn turc. Segon Amnestia Internacionala, 4 personas serián mòrtas a causa de la repression policièra.

Çò que comencèt amb una protèsta, contra un projècte d’urbanizar un pargue en i metent un centre comercial e d’apartaments, es vengut una seguida de protèstas que, dempuèi divendres passat, luchan e resistisson a una repression policièra de las fòrtas. Tot aquò a alucat un movement de contestacion contra las politicas conservatrises e religiosas del govèrn de l’islamista Recep Tayyip Erdoğan.
 
De desenats de milièrs de ciutadans se son amassats tre dissabte passat a la Plaça Taksim, al centre d’Istambol. Fòrça d’eles i an passada la nuèch.
 
Los manifestants an un cèrt sentiment de victòria; an capitat de prene lo centre d’Istambol sens cap d’oposicion e an capitat de forçar lo govèrn a retirar los policièrs antisusmautas del centre vila, e sustot an capitat de demostrar que s’agís d’una protèsta civica.
 
Los acampats, que la majoritat son de joves, an assegurat que las susmautas d’aquesta dimenjada son estadas provocadas per la quita polícia, amb un usatge injustificable del gas lacrimogèn. De fach, pauc de mond se remembran d’aver vist tanta polícia: son de milièrs d’agents qu’ocupan de quartièrs entièrs de la vila. Lo nombre de ferits es nombrós. Es precisament aquel abús qu’a provocat que mantes sectors de la societat ajan jonch las protèstas.
 
Una autra victòria dels joves es qu’an capitat que lo primièr ministre comparesca per parlar de la crisi. Recep Tayyip Erdoğan reconeguèt que la polícia s’es benlèu excedida dins qualques cases, mas qualifiquèt los manifestants de simples radicals als òrdres de las fòrças politicas interessadas per destabilizar lo país. Dins aquel sens, Erdoğan prometèt que cediriá pas a lors pressions.
 
Los manifestants son pas solament de l’oposicion laïca e nacionalista, i a tanben d’islamistas malcontents amb las politicas d’Erdoğan. Protèstan mai que per salvar un pargue; son contra una seguida de decisions que mòstran lo caractèr autoritari de l’actual govèrn: l’empresonament de jornalistas, l’eliminacion de las terrassas o las restriccions a las bevendas alcolicas; en definitiva, un retorn a las costumas d’a passat temps.