Lo govèrn espanhòl a pas permés a quinze anestesistas kosovars de participar, la dimenjada passada, al Congrès Europèu d’Anestesiologia que se debanèt a Barcelona e que i participèron sièis mila professionals d’estats d’Euròpa tota e d’endacòm mai. Los visats per intrar dins l’estat espanhòl se demandèron a l’ambaissada espanhòla a Skopje (Macedònia), que los refusèt. Ni la Societat Europèa d’Anestesiologia, nimai la Societat Catalana, capitèron pas que la consolessa espanhòla permetèsse als cercaires de participar al congrès. Pr’amor qu’Espanha reconeis pas Kosova, permet pas d’intrar als ciutadans kosovars, levat dins de cases extraordinaris.
 
Lo president de la Societat Catalana d’Anestesiologia, Jaume Canet, explicava al jornal catalan Vilaweb que “fa un mes e mièg, la Societat Europèa d’Anestesiologia, qu’es a Brussèlas, me demandèt se podiam far quicòm dempuèi aicí perque i aviá quinze anestesistas kosovars qu’èran inscriches al congrès e qu’avián demandat lo visat per intrar dins l’estat espanhòl, mas òm los refusèt.”
 
Faguèron la demanda a l’ambaissada espanhòla d’Skopje pr’amor qu’es l’ambaissada mai prèpa. Après lo refús, la societat europèa s’adreicèt a l’ambaissada qualques còps amb una letra que disiá qu’aquelas gents anavan participar a un congrès scientific en de datas concretas, qu’avián ja lo finançament per i anar e que l’inscripcion èra facha. Mas l’ambaissada contunhèt de refusar lo visat. “Quand eles m’o diguèron, decidiguèrem de telefonar personalament nosautres a l’ambaissada espanhòla en Macedònia”, çò disiá Canet, qu’explicava que faguèt la gestion amb la presidenta del comitat local d’anestesia. “Ela parlèt amb la consolessa espanhòla. Li diguèt que podián pas donar los visats perque se complissiá pas cap dels requisits per los donar, que son tres: per de rasons umanitàrias, per l’interès d’Espanha o per lo compliment de qualque afar oficial”.
 
“Insistiguèrem qu’èra un congrès scientific. E diguèron qu’o poirián solament far s’avián l’òrdre dirècte del Ministèri dels Afars Estrangièrs de Madrid. A títol individual faguèrem un contacte amb lo ministèri mas pendent tot aquel temps avèm pas agut cap de responsa. Doncas, aqueles quinze anestesistas an perdut l’argent de l’inscripcion e de tot, e vendràn pas”, çò apondiá Canet.
 
De son costat, la Societat Espanhòla d’Anestesia diguèt que l’afar èra pas dins sas obligacions e preferiguèron s’i engatjar pas.
 
Canet contava a Vilaweb que la societat europèa es fòrtament estonada per l’actitud de l’ambaissada espanhòla. “Los de la Societat Europèa d’Anestesiologia son estonats, perque malgrat que comprengan que i a un problèma en Espanha, pensavan qu’aquò deviá pas afectar una activitat scientifica”.
 
Espanha s’entèsta a reconéisser pas Kosova perque segon lo president espanhòl, Mariano Rajoy, “crei pas a las declaracions unilateralas d’independéncia”. Aital Espanha ensaja d’evitar una declaracion unilaterala d’independéncia prevista pel Parlament de Catalonha se totes los ensages de convocar un referendum en favor son frustrats.