Lo diccionari, que tanben se pòt consultar en linha, es estat definit pels sieus autors coma un “eveniment istoric”. Lo conselhièr friolan a la Cultura, Elio De Anna, a dich que lo diccionari confirma l’importància e l’atencion que las institucions “balham al friolan”, sens oblidar “las autras lengas parladas dins la region”. “Volèm conservar la nòstra identitat lingüistica”, a apondut De Anna. Al sieu torn lo conselhièr a l’agricultura, Claudio Violino, a remembrat las paraulas del famós cineasta Pierpaolo Pasolini en dire: “Uèi avèm causit d’èsser friolans”. Violino a tanben dich que lo diccionari es pas sonque un instrument scientific, mas tanben una expression de “la fiertat d’un pòble que, dins lo passat, aviá pas la possibilitat de portar en defòra dels ostals la lenga pròpria”.


 

De fach, lo diccionari es l’investiment mai important que lo govèrn autonòm a fach dins las darrièras annadas en politica lingüistica. Mercés a aquel diccionari, dison los sieus promotors, los parlants del friolan an un esplech dels importants per la promocion de la lenga. La tòca es de servir, mai que mai, los professors, los escolans, los jornalistas, los escrivans e totes los que voldràn escriure amb correccion en lenga friolana. L’usatge del diccionari favorizarà tanben l’arrèst de l’invasion de mots estrangièrs (sustot italians) dins la lenga friolana.

Aqueste article ven del jornal catalan Nationalia.cat, amb qui Jornalet a un acòrdi de cooperacion.