Actualitats
Los primièrs sondatges autrejan la victòria a Hollande
De mèdias de defòra de l'Estat francés an publicat de sondatges que balhan al candidat socialista 53% dels vòtes, per davant de Sarkozy amb 47%
De sondatges faches per de mèdias de defòra l'Estat francés al moment que lo mond votavan, autrejan al candidat socialista, François Hollande, la victòria en aquel segond torn de las eleccions presidencialas francesas. Hollande auriá 6% mai de vòtes que Nicolas Sarkozy. Los sondatges de las televisions francesas publicats a 20h confirman aquestes resultats.
A 18h an barrat los collègis electorals de la majoritat de municipalitats, malgrat que los de las principalas vilas barraràn a uèch oras del ser.
L'entrepresa nòrd-americana Harris Interactive balha a Hollande 53% dels vòts, e a Sarkozy, 47%. De donadas identicas a balhat l'entrepresa britanica
Sofres.
La premsa soïssa, coma
Tribune de Genève, publica de sondatges que balhan tanben la victòria a Hollande, entre 52,5% e 53%, del temps qu'a Sarkozy li autrejan 47%.
Los sondatges de las televisions francesas publicats a 20h confirman aquestes resultats: Hollande seriá lo president amb 51,9% dels vòtes.
La participacion es de 30,66% a miègjorn
, 4% mens qu'en 2007, e 2% mai qu'al primièr torn
Las primièras donadas de participacion del segond torn de las eleccions presidencialas francesas remarcan qu'a miègjorn 30,66% dels votants enregistrats avián ja mes lo lor vòte dins l'urna. La chifra es 2% mai nauta que la del primièr torn a la meteissa ora, mas es 4% mens que la chifra del segond torn de 2007, segon de donadas del ministèri de l'Interior.
L'actual president francés, Nicolas Sarkozy, e lo candidat socialista François Hollande s'afrontan uèi al segond e definitiu torn de las eleccions presidencialas de França, quinze jorns après qu'Hollande ganhèsse al primièr torn. Lo candidat socialista partís amb aquel avantatge e amb lo sosten dels autres candidats d'esquèrra e de centre. Mentretant, Sarkozy a anonciat que daissarà la politica se pèrd uèi las eleccions.
Sarkozy partís amb desavantatge, quitament se dins los darrièrs jorns s'apròcha cada còp mai a Hollande segon los sondatges. En bona partida aquò dependrà de çò que faràn los electors del Front Nacional de Marine Le Pen, que donèt libertat de vòte als sieus simpatizants. Per ganhar uèi, Sarkozy a de besonh d'aqueles vòtes. Lo candidat president aviá perdut de popularitat pendent lo sieu darrièr mandat a l'Elisi, mas fa qualques jorns trapèt un autra complicacion per èsser reelegit: la documentacion que confirma que lo dirigent libian Muammar el Qadhdhafi subvencionèt amb cinquanta milions d'èuros la campanha de 2007, fach que lo nòu govèrn libian a desmentit.
Alavetz, mentre que Sarkozy a pas cap de sosten, Hollande a lo sosten del Front d'Esquèrra, dels Verds e del centrista François Bayrou a títol personal.
Lo futur de França dins l'UE dependrà dels resultats de uèi. Sarkozy es per la creacion d'un nòu tractat europèu per refortir l'integracion fiscala e economica, del temps qu'Hollande a ganhat de sostens amb las siás criticas constantas a l'actual pacte fiscal europèu.
Era des•hèita de Sarkozy qu'ei era des•hèita dera mensonja e dera vulgaritat. Ua tempsada navèra que comença entara França mes tanben entar'Occitània.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari