Las tropas de Bamako an recuperat Anéfis e an anonciat que se preparan per partir vèrs la capitala regionala, Kidal. L’MNLA reclama una sortida negociada del conflicte après aver renonciat a l’independéncia d’Azawad.

La guerrilha majoritàriament toarèg del Movement Nacional per la Liberacion d’Azawad (MNLA) reconeguèt ièr dimars qu’aviá perdut lo contraròtle de la vila d’Anéfis, plaçada al limit entre las províncias de Kidal (contrarotlada per la fòrça toarèg) e Gao. Un dels caps de l’MNLA, Ibrahim Ag Muhammad Asaleh, a dich a l’agéncia de nòvas AP que los guerrilhièrs se son retirats de la vila de paur que l’irrupcion de l’armada maliana i provòque un masèl.
 
La casuda d’Anéfis es remarcabla perque es lo primièr còp que l’armada maliana gausa ocupar una vila dins la província de Kidal dempuèi l’intervencion militara francesa en Mali, al començament d’ongan. L’ofensiva poiriá èsser encara mai ampla: MaliActu ditz que las tropas malianas se dirigisson vèrs Amassine, a l’oèst de Kidal.
 
Just abans l’engatjament francés dins la Guèrra de Mali, las fòrças armadas malianas èran en una situacion de desfacha totala.
 
L’ofensiva es arribada solament un jorn après que Bamako anoncièsse la siá intencion de recuperar lo contraròtle efectiu de Kidal, çò ditz Jeune Afrique.
 
La setmana passada, un pòrtavotz de l’MNLA disiá dempuèi Burkina Faso que la guerrilha toarèg èra dispausada a negociar amb Bamako per trobar una sortida al conflicte. Lo comunicat, publicat sul web oficial de l’MNLA, disiá que lo grop renonciava a l’independéncia d’Azawad (la zòna nòrd de Mali que la guerrilha proclamèt independenta unilateralament en 2012) e criticava las exaccions contra las personas d’origina toarèg dins divèrsas regions de Mali.
 
 
D’interèsses occidentals
 
Azawad se tròba entre lo desèrt de Sahara e la region de Sahèl, doas zònas fòrça importantas estrategicament. D’un costat, conten de ressorsas naturalas importantas. De l’autre, es un territòri plan vast ont opèran qualques grops jihadistas. França ten de ligams fòrça estreches amb Mali, Chad e Nigèr, ont los Estats Units an una basa de drònes (avions militars sens pilòt). Mentretant, Argeria ensaja de contunhar de jogar son ròtle coma poténcia regionala.
 
 
 
 

 
 
 

Aqueste article ven del jornal catalan Nationalia.cat, amb qui Jornalet a un acòrdi de cooperacion.