S’apèla Ceyda Sungur e es una assistenta de recèrca e professora de l’Universitat Tecnologica d’Istambol. Son burèu academic es plaçat al bòrd del Pargue Gezi, la scèna de las protèstas dins la vila mai granda de Turquia, que comencèron fa mai de dètz jorns. Dimars passat, Sungur i volguèt intrar per jónher l’acamp e foguèt reprimida sul pic per la polícia. Un fotograf de l’agéncia Reuters captèt lo moment e tre dimècres la fotografia es a córrer coma la polvera, convertida en tot un simbòl.
 
Lo fotograf Osman Orsal explica que prenguèt la camèra en pensant que l’imatge de la Professora Sungur èra especiala. S’avisèt qu’èra abilhada amb las colors de la bandièra turca. La fotografia es de la primièra segonda de l’incident, quand un policièr plan armat li lançava de gases lacrimogèns sus la cara, çò que fa que los pels li cobriscan la cara. Immediatament après, un autre policièr se lancèt sus ela dessús e la tustèt.
 
Apareguèron mai tard un molon de fotografias de l’incident fachas per d’autres fotografes o per de gents amb lors telefòns mobils. E lo nom d’aquela assistenta de recèrca comencèt de sortir sus las primièras paginas dels jornals turcs e de tot lo Mond. Ça que la, Sundur defugiguèt la notorietat. Publiquèt un brèu comunicat ont sonque disiá qu’ela èra una persona atacada de mai, coma tantas n’i a agudas aquestes jorns passats.