Dijòus passat comencèt la reünion annala del Club Bilderberg dins una ostalariá de Watford, a 30 quilomètres de Londres. Aquel forum format per de membres permanents e convidats, l’intègran los principals representants de las grandas entrepresas multinacionalas, e de personalitats de l’encastre politic e de l’economia mondiala. Las amassadas son totjorn secretas.

Las darrièras reünions del club se faguèron als Estats Units arunan, en Soïssa en 2011, en Catalonha en 2010 e a Atenas en 2009. Malgrat que se sàpia pas exactament lo contengut d’aquelas amassadas, fòrça analistas fan la relacion entre las reünions del club e la crisi, amb de salvaments economics posteriors d’aqueles païses.
 
 
Lo Club Bilderberg, qu’es aquò?
 
La Conferéncia Bilderberg, coneguda tanben coma Grop o Club Bilderberg, es una conferéncia annala qu’amassa, per estricta invitacion, qualques 130 convidats de tot lo Mond. La majoritat d’eles son d’entrepreneires, d’academicians e de politicians influents, que s’amassan en d’ostalariás de luxe d’Euròpa e de l’America del Nòrd. S’agís d’un forum informal e privat, barrat als mèdias. La conferéncia a un burèu permanent a Lèida (Païses Baisses).
 
Lo nom de Bilderberg ven del fach que la primièra conferéncia oficiala del grop se debanèt dins l’Ostalariá Bilderberg, a Oosterbeek (Païses Baisses), los 29 e 30 de mai de 1954. Lo sieu promotor foguèt l’emigrant josieu polonés e conselhièr politic Joseph Retinger, que, inquiet per la creissença de l’antiamericanisme en Euròpa Occidentala, prepausèt una conferéncia internacionala que los caps d’opinion dels païses europèus e dels Estats Units i se poirián amassar, amb l’objectiu de promòure l’intercompreneson entre los dos costats de l’Atlantic.
 
Retinger convidèt lo prince Bernat dels Païses Basses, qu’acceptèt de promòure l’idèa, e tanben lo primièr ministre bèlga Paul van Zeeland. La lista dels convidats seriá confeccionada per que i aguèsse dos assistents de cada estat, cadun d’eles per representar lo vejaire conservator e lo progressista.
 
Lo succès de l’amassada encoratgèt los organizaires a far una conferéncia annala. Se creèt un comitat de direccion permanent e Retinger foguèt designat secretari permanent. L’intencion declarada del Grop Bilderberg èra de “far un nos a l’entorn d’una linha politica comuna entre los Estats Units e Euròpa en oposicion a Russia e al comunisme”.
 
Demest los assistents a Bilderberg i a de banquièrs, d’expèrts en defensa, d’editors de premsa e de directors de mèdias, de ministres de govèrn, de primièrs ministres, de membres de las monarquias europèas, de financièrs internacionals e de caps politics d’Euròpa e de l’America del Nòrd.
 
Qualques unes dels participants mai abituals son lo magnat David Rockefeller, l’èx-secretari d’estat Henry Kissinger, l’èx-vicepresident de la Comission Europèa Étienne Davignon, la reina Beatritz dels Païses Basses, lo politician republican nòrd-american Donald Rumsfeld, l’entrepreneire irlandés Peter Sutherland o l’èx-sossecretari de la Defensa dels Estats Units e posterior president de la Banca Mondiala, Paul Wolfowitz.