Lo jornal occitan d’expression francesa Sud Ouestexplicava ièr qui èra Clément Méric, segon çò qu’aviá amassat de divèrsas fonts.

Lo jove militant d’extrèma esquèrra, que foguèt assassinat dimècres a París dins sos 18 ans, èra un estudiant de sciéncias politicas. Un comunicat de premsa per “salvar lo dòl a la familha” foguèt publicat sul sit antifaissista La Horde. Aquel comunicat explicava que Clément Méric èra un jove sindicalista e militant antifaissista.

L’estudiant “sortissiá d’una leucemia”, çò explicava sus Twitter un jornalista de Le Monde present a la conferéncia de premsa de l’Action Antifasciste Paris-Banlieue. “Clément èra luènh d’esser un guerrièr, pesava solament 60 quilos”, apondiá un dels sieus camaradas a Le Nouvel Obs.

Dins Libération un estudiant de sciéncias politicas testimoniava que lo Clément “èra pas un brutlat, èra un militant politic, se lançava pas dins las batèstas de clucons, sustot qu’aviá vist que los garris qu’aviá davant avián d’armas”.

Segon Le Nouvel Obs, Clément Méric èra engatjat contra l’extrèma drecha e apareissiá dins lo vidèo d’una manifestacion contra la Manif pour Tous, es a dire, l’organizacion opausada al maridatge pels omosexuals que tant de rambalh an fach e qu’an quitament protagonizadas d’agressions omofòbas. Segon aquel jornal, Clément Méric es lo gojat que pòrta un mocador de còl roge e que ten la bandieròla “L’homophobie tue” (L’omofobia tua). De fach, la pagina Facebook creada en sa memòria explica que “Clément es estat assassinat per l’extrèma drecha, la meteissa que desfilava contra los maridatges omosexuals”.

Le Télégramme explicava que lo jove Clément èra nascut a Brèst, filh de dos professors retirats de la facultat de drech de la vila bretona. Segon aquel jornal breton, los parents de Clément Méric vivon ara en Occitània, mai concretament a Pavia (País d’Aush).

France 3 Bretanha precisa que Clément Méric aviá obtengut l’an passat son bachelierat S amb la mençon “fòrt plan”. Lo director de son licèu de Brèst declarava a Le Télégramme que s’agissiá d’un jove “cortés e respectuós dels autres. Èra qualqu’un amb qui èra totjorn agradiu de discutir e qu’èra a de quilomètres de çò qu’ausissi dire de còps dempuèi aqueste matin…”

A tot aquò cal apondre lo retrach del jove assassinat que publicava France Info. Segon la ràdio francesa, Clément Méric èra vegetarian e antispecista, es a dire que s’opausava a l’esplecha dels animals. Èra solidari e aviá militat en favor dels senspapièrs. Un pauc rebèl mas bon escolan, èra engatjat amb lo sindicat CNT.
 

_____
Vidèo — De milièrs de personas an manifestat per tot lo Mond lor indignacion e dolor per l’assassinat del jove breton Clément Méric en mans de l’ultradrecha. D’acamps de refús e d’omenatge a la victima se son debanats dins las principalas vilas occitanas. Dijòus de vèspre, a París, de milièrs de personas cridavan “No pasarán” en li fasent omenatge.