Actualitats
Lo govèrn francés illegalizarà lo grop d’ultradrecha dels assassins de Méric
A anonciat que dobrirà una procedura per dissòlver e illegalizar aquel e d’autres gropusculs violents
Lo govèrn francés a aviat un procès per dissòlver e illegalizar lo grop d’ultradrecha de las Joventuts Nacionalistas Revolucionàrias (JNR), que cinc de sos membres son estats detenguts per la mòrt del militant antifaissista Clément Méric. Lo primièr ministre francés, Jean-Marc Ayrault, a demandat al ministre de l’Interior, Manuel Valls, qu’examine las condicions d’aplicacion del Còde de la Seguretat Interiora sus los gropusculs d’extrèma drecha.
Clément Méric, militant del sindicat d’estudiants Solidaires Étudiant-e-s e d’Action Antifasciste Paris-Banlieue, moriguèt dijòus de ser, dins sos dètz e nòu ans, en una agression brutala venent d’un grop d’extrèma drecha al centre de París, que lo daissèt en mòrt cerebrala pendent un jorn. Uèch individús d’entre vint e trenta ans son estats detenguts coma presumits autors de l’assassinat. Segon qualques mèdias, lo principal acusat es espanhòl.
“En basa a las pròvas presentadas pel ministre de l’Interior, li ai demandat la dobertura immediata d’una procedura acusatòria, prèvia a la presentacion al president de la Republica e al Conselh dels Ministres d’un decret de dissolucion de las Joventuts Nacionalistas Revolucionàrias”, çò anoncièt Ayrault dins un comunicat. Tanben demandèt a Valls qu’examinèsse “mai a fons las condicions en las qualas d’autras associacions o grops pòscan èsser someses a la meteissa procedura”. Apondiá que “i a pas ni i aurà pas cap de complasença per aqueles grops de violéncia e d’òdi dels autres”.
Las JNR son una filiala del grop d’ultradrecha Tresena Via (Troisième Voie).
Acamp de las Joventuts Nacionalistas enebit a Tolosa
Lo govèrn francés a ja enebit l’acamp de las Joventuts Nacionalistas (un autre grop, que lo cal pas confondre amb las JNR), qu’èra previst a Tolosa per ièr.
Las Joventuts Nacionalistas son la filiala del grop d’ultradrecha de l’Òbra Francesa (Œuvre française) e pretendián far omenatge al Marescal Philippe Pétain.
Articles relacionats
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Marine Le Pen demanda l'illegalizacion de l'extrèma-esquèrra. Sembla que l'illegalizacion de l'extrèma-dreita la desrenga. Quora es la "dreita" al poder, las opinions son inversadas.
Se cal pausar la question : quora los extrèmas s'exprimísson per la fòrça, o a docina las invectivas, sèm en situacion de bona democracia ?
Aquel afar pròva al mens, se cal aver pròvas, que lo sistèma democratic francés non respecta las diversitats de las opinions, e non las autoriza dins lo seu parlament, que fosquèsse d'extrèma-dreita à d'extrèma-esquèrra ; e en mai, podèm apondre que la dictatura de la majoritat (dels camps de dreita o d'esquèrra, concepte que m'agrada pas dins un sistèma nacionalista francés ) es pas establir la patz civila.
Es que lo sistèma centralista francés, alonhat de las populacions e de las loras realitats, favoriza pas los extremismes ?
#1 En estat espanhòu valorizam fòrça positiuaments era decision der estat francés. En Espanha aurien ilegalizada era formacion deth joen mòrt en l'acusar de terrorisme.
Es partits d'ultradreta en Espanha se presenten as eleccions, e era majoria an delictes de sang que non transcendisssen guaire. Per contra, an illegalizat Batasuna, Segi, Jarrai e es movements d'esquèrra indeoendentista bascos.
Qual crei que l'illegalizacion d'un gropuscul de skinheads abestits stoparà la violéncia politica ? La conariá brutala es malurosament generalizada dins aquela societat que pèrd sas marcas democraticas.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari