Mantas organizacions sindicalas de l’aviacion civila an avertit de la cauma que se debanarà deman, dimècres e dijòus (de l’11 al 13 de junh), segon un comunicat del Ministèri dels Transpòrts francés.

La cauma es convocada pels sindicats GCT, CFDT, UNSA e FO en coordinacion amb d’autres sindicats europèus, en protèsta contra los projèctes de liberalizacion del sector de la navigacion aeriana per la Comission Europèa.
 
Segon l’USAC-CGT, sindicat majoritari del sector, “los futurs reglaments europèus que tanhon la navigacion aeriana son un atac dirècte contra lo caractèr de servici public d’aqueste sector d’activitat”. Cèrcan “d’externalizar e de metre en concurréncia de seccions entièras de la gestion de la navigacion aeriana”, çò ditz lo sindicat, que precisa que las consequéncias seràn “un impacte negatiu sus la seguretat e una degradacion de las condicions de trabalh dels agents”.
 
Del sieu costat, la direccion generala de l’aviacion civila (DGAC) a demandat a las companhiás aerianas de redusir lor programa de vòls de 50% per aquelas 3 jornadas als aeropòrts de Niça, Marselha, Tolosa e Bordèu; e tanben als de París e Lion.
 
S’espèra de perturbacions per tot l’estat francés que pòdon afectar d’autres païses. La DGAC invita los passatgièrs a s’informar pròche lor companhiá aeriana.