Una marcha a demandat que se reconesca la lenga silesiana e que s’emplegue la bandièra de Silèsia dins las bastissas publicas. S’espèra una manifestacion mai granda en favor de l’autonomia en julhet. Los ciutadans que s’autoidentifican nacionalament coma silesians s’envòlan dins lo darrièr cens de Polonha

Las organizacions silesianas organizan de manifestacions pendent los meses de junh e de julhet per reclamar a Polonha l’autogovèrn de Silèsia e la reconeissença de la nacionalitat silesiana. La primièra d’aquelas mobilizacions, la Marcha per l’Identificacion Silesiana, se debanèt dissabte a Mysłowice. Jos la proteccion del Conselh per la Nauta Silèsia (una coordinacion d’entitats), la marcha èra convocada per Ślōnskŏ Ferajna, una organizacion que reclama lo drech de “de la nacion silesiana” a l’autodeterminacion.
 
Los manifestants demandèron tanben a Polonha la preséncia de la bandièra silesiana dins las bastissas publicas e que se sostenga lo silesian, una varietat lingüistica eslava qu’es parlada en Nauta Silèsia, dins los airals vesins de la Republica Chèca e per la diaspòra silesiana en Alemanha. Polonha reconeis pas lo silesian coma lenga, mas coma dialècte del polonés. Qualques lingüistas afirman qu’es una lenga, del temps que fòrça autres dison que n’es pas una. Dins la lingüistica eslava classica, en tot cas, i a un consens larg per dire que lo silesian es ben un dialècte polonés.
 
La manifestacion comptèt amb la preséncia de 150 personas. Una participacion mai nauta s’espèra per la Marcha per l’Autonomia que se debanarà lo 13 de julhet que ven a Katowice. La marcha es convocada pel Movement per l’Autonomia Silesiana (RAS, segon sa sigla en polonés), un partit politic que defend la descentralizacion de Polonha e l’autonomia per la Nauta Silèsia (e eventualament, per la Bassa Silèsia), coma manièra d’avançar cap a una Euròpa de las regions.
 
Las manifestacions d’ongan se fan après que se coneguèsse que l’autoidentificacion dels ciutadans amb la nacionalitat silesiana aviá pojat d’un biais espectaclós pendent lo darrièr decenni. Se, dins lo cens de 2002, 173 000 personas avián declarat èsser de nacionalitat silesiana, al cens de 2011 la chifra aviá pojat fins a las 847 000. Fins a uèi, lo movement silesian èra estat solament de caractèr regionalista o autonomista (una tendéncia representada pel RAS), mas al cors dels darrièrs ans son aparegudas divèrsas organizacions de caractèr autodeterminista o quitament independentista.
 
 
 
 
 
 
 
 
 
 
Aqueste article ven del jornal catalan Nationalia.cat, amb qui Jornalet a un acòrdi de cooperacion. L’article es estat elaborat amb las informacions de Marin Grabowski