La primièra jornada de las Encontradas, recampament departamental d’Aude de las escòlas publicas en occitan, se debanèt dimars a Campendut (Corbièras).
 
125 classas e 3000 escolans i èran. An trabalhat l’annada tota sul projècte pedagogic academic que se ditz “Eriç e l’espaurugal”. Un eiriçon se vòl faire ortalhièr. Amb l’ajuda de l’espaurugal, van ensajar de faire partir las bèstias marridas de l’òrt, abans de se trachar que totes an son utilitat dins un òrt ecologic.
 
Los enfants an trabalhat sus un album, una BD, de comptinas, de cants e de danças, de poesia... sus la tematica.
 
Lo jorn de l’Encontrada, tornan trapar los personatges e tèmas estudiats amb entre autres: una comèdia musicala amb Coriandre e Gargamèla, de teatre amb la Companhiá de La Loue, de musica amb los Golamàs’K, La Fanfareta, Fai Dèli, Castanha e Vinovèl, de contes amb Miriam Baffie e Alan Roch, d’espòrt amb l’USÈP e d’autras animacions prepausadas per de benevòls.
 
Las classas son siá de classas ont l’occitan es ensenhat coma lenga viva, siá de classas bilingüas. Es de notar tanben la participacion de certanas Calandretas.
 
Felip Vialard, encargat novèl per l’occitan a la region, venguèt sus plaça mesurar l’afogament de las classas.
 
Aquela operacion se realiza mercé a l’ajuda de la Region de Lengadòc-Rosselhon, dels quatre conselhs generals, del Ministèri de l’Educacion Nacionala e de las comunas convidairas.
 
Los rendètz-vos venents son: Mende lo 13 de junh, Alès lo 18 de junh, Viàs lo 20 de junh. En tot, gaireben 8000 escolans de l’acadèmia son concernits, de la pichòta seccion de mairala fins al CM2.
 
 
 
 
Ives Seguier
Conselhièr pedagogic en occitan