Los dos principals partits de Grècia se son desflorats a las eleccions d'aqueste dimenge. Nòva Democracia e lo PASOK, qu'an governat lo país dempuèi la Segonda Guèrra Mondiala, an perdut una granda quantitat de vòtes. L'estonament ven per la Coalicion d'Esquèrra Radicala Syriza, que ven la segonda formacion, davant los socialistas. Se remarca tanben l'aument del supòrt als neonazis Chrysi Avgi (Alba Daurada), que poirián intrar dins lo parlament. Nòva Democracia e lo PASOK an anonciat qu'ensajaràn de formar un govèrn d'unitat pròeuropèu.

Dins los comicis grècs Nòva Democracia a obtengut, a 99,25% de l'escrutini, una majoritat minimala, amb 18,87% dels vòtes, mentre que lo PASOK  arriba a 13,19%. La granda davalada de socialistas e conservadors ven de l'aument de vòtes a la coalicion de partits d'esquèrra Syriza, qu'a obtengut 16,76% dels vòtes, en superant lo PASOK e en tot devenir la segonda fòrça del país. Tanben a crescut l'extrèma drecha, qu'a atengut pauc mens de 7%, un percentatge que lor garentís l'intrada dins lo parlament grèc.
 
Los grècs an punit aital los partits de l'actuala coalicion de govèrn, favorables als acòrdis de salvament pactats amb l'Union Europèa. De la nòva composicion del parlament, sortirà un nòu primièr ministre que remplaçarà l'interimari Loukas Papadimos. Aquel novèl parlament decidirà se manten los tèrmes del plan de salvament o se renegòcia la situacion amb Euròpa.
 
La situacion politica en Grècia apond d'incertitud al plan de salvament de l'UE, la Banca Mondiala e l'FMI, qu'exigisson a Atenas una reduccion de 11 500 milions d'èuros de despensa publica per junh en escambi dels 173 000 milions acordats. I a la possibilitat que l'executiu que sorgirà d'aquelas eleccions vòlga renegociar aquel acòrdi.

Nòva Democracia e lo PASOK an anonciat qu'ensajaràn de formar un govèrn d'unitat pròeuropèu.