La creacion d’un casinò sul front de mar se metrà al vòte del conselh municipal de Marselha diluns que ven. Segon la municipalitat, aquel projècte poiriá portar a la vila dètz milions d’èuros per an e seriá alestit dins quatre a cinc ans, segon çò que diguèt dijòus passat a l’AFP lo secretari general de la comuna, Jean-Claude Gondard. L’endrech de bastir seriá la getada portuària de la J4, al costat del Musèu de las Civilizacions d’Euròpa e de la Mediterranèa (MUCÈM), mentre que la municipalitat tanben vòl far una zòna toristica entre lo Pòrt Vièlh e lo pòrt de comèrci, e aculhir de crosieristas de luxe.

Lo futur casinò, que vòlon far mejançant un contracte amb un casinotièr après una crida d’ofèrtas, seriá bastit dins aquel sector portuari de la J4, près dels sits de desembarcament de crosieristas. Lo plan tanben inclutz d’aculhir de vaissèls de plasença de luxe, près de la J1.
 
La primièra estapa per establir lo casinò serà lo vòte del conselh municipal de diluns. Après vendrà lo lançament d’estudis e procediments, mai que mai l’autorizacion de l’Estat. L’oposicion de Fai Ganhar Marselha (grop compausat per lo PS, lo Modèm e la societat civila) se mòstra sceptic sus l’installacion d’un sit de jòcs en una ciutat qu’a de grandas dificultats socialas. En mai d’afirmar qu’un casinò atrai d’activitats illegalas parallèlas que convenon pas gaire a la Ciutat Focèa, creson pas gaire als estudis economics faches e revendican que l’argent s’investisca per far un teleferic vèrs la glèisa Nòstra Dòna de La Gàrdia, e mai per bastir una “arena”, çò es una sala d’espòrts e d’espectacles per aculhir 15 000 personas.
 
De son costat, la municipalitat crei que “cau confortar lo desvolopament continú de la vila amb la creacion de nòus espacis requalificats e renduts au public”. De fach, la comuna que compta sus qualques 10 milions d’èuros per an de redevença quand l’endrech aculhirà de crosieristas.
 
Pendent qualques decennis, l’idèa d’un casinò èra impensabla dins la Ciutat Focèa. Mas l’idèa venguèt quand la Societat Nacionala Corsega-Mediterranèa (SNCM) metèt en venda son sèti istoric. “Pendent lòngtemps lo cònsol a considerat que Marselha se deviá pas posicionar sus aqueu tipe d’esquipament”, çò disiá Gondard, qu’apondèt que “uei a cambiat de vejaire”, e mai se fin finala lo sit de l’SNCM li conven pas.

Fuente:  apuestastest.com