Un fisician de l’Universitat de Rochester (Estats Units) e son filh de catòrze ans an creat una capa que permet de venir invisible. Lo scientific, John Howell, a soslinhat que l’experiéncia l’an facha amb de materials “a bon mercat e simples”, mas que foncionan d’un biais “susprenentament eficaç”.
Lo sistèma inventat per John e son filh Benjamin es capable d’amagar d’objèctes grands dins tot lor aspècte optic. Lo trabalh qu’an fach es estat publicat dins la revista Arxiv.
Aquò fonciona amb tres dispositius. Lo primièr, de plexiglàs amb de tubes d’aiga en forma d’L. Lo segond utiliza quatre lentilhas per aténher un camoflatge optic. E lo tresen se basa sus un ensems de miralhs. Amb tot aquò an atench l’invisibilitat, es a dire, la qualitat d’èsser pas vist.
Amb lo mecanisme de la familha Howell, s’arriba d’amagar lo còrs d’una persona “en doblant” la lutz en un espaci determinat per l’amagar. Coma o a explicat l’investigator, totes los materials qu’an emplegat los an crompats en de botigas de bas còst e lo budget total de l’experiéncia es estat de 150 dolars. De mai, se poiriá reprodusir a granda escala.
Mas la capa per se rendre invisible a tanben sos limits. Howell a revelat que “lo ponch flac d’aquela tecnologia es que fonciona solament en una direccion, doncas cal que l’observaire càmbie pas de plaça”.
Ça que la, la descobèrta es fòrça mai avançada que d’autres sistèmas presentats fins ara.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Invisibilitat dins una direccion... lei peis rotges pòdon ja faire aquò : podetz faire lo carcul embé de conoissanças d'un bòn escolan de terminala S, dins un bocau redon (transparent e plen d'aiga) li a una region qu'es invisible per un observator fixe.
Ço qu'apelam invisibilitat, ço qu'es malaisit, es precisament de poder s'adaptar a totei lei posicions de l'observator.
Jo qu'èi vist quauquarren de parièr au hinestron, au "Mei grand cabaret deu Monde". Lòl !
E ieu sai cossí far per que totes los fisicians de Rochester e sos filhs me sián invisibles quitament quand soi a bolegar: barri los uèlhs. Tròp fòrt!
Pfff, pas res pas nòu, fa temps que l'occitan a capitat d'èsser invisible.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari