Fa d’ans que la violéncia s’es incrustada dins la Republica Democratica de Còngo. De conflictes de tota mena e de violacions dels dreches umans afèctan de grands airals d’aquel país immens de l’Africa centrala, amb qualques milions de mòrts e de desplaçats. L’estat es pas capable de far res, los païses vesins fan pas res e la comunautat internacionala tanpauc; tot aquò a ajudat a esperlongar la guèrra.
 
Es per aquò que, segon The Economist, lo Conselh de Seguretat de l’ÒNU es a soscar per dessenhar una linha roja e s’i engatjar dirèctament.
 
Après catòrze ans amb una mission de patz sul terren, pel primièr còp dins l’istòria, las Nacions Unidas serián dispausadas a i comandar una operacion militara. The Economist a revelat que tres mila soldats de Malawi, Sud-Africa e Tanzania, amb l’emblèma de l’organisme internacional, se desplegarián en Còngo amb l’objectiu de luchar contra las faccions rebèllas activas dins l’èst del país. Seriá l’ÒNU, e non pas l’OTAN ni los Estats Units, que s’encargariá dirèctament de totas las operacions armadas: amb d’artilhariá, d’elicoptèrs, d’atacs terrèstres...
 
Segon lo jornal estatsunidenc, lo fach que las Nacions Unidas sosquen a trencar lor neutralitat istorica implica de risques perque, en cas que l’operacion capitèsse mal, lor imatge ne poiriá demorar gastat a tèrme long.