Los enfants de l’escòla Diwan (escòla en breton per immersion) de Kistreberzh (Bretanha) an fach aqueste diluns 17 de junh una petita iniciacion a la lenga occitana. A partir de documents fornits per l’Institut d’Estudis Occitans, an pogut descobrir ont es Occitània e qualques rudiments de lenga occitana: cossí se presentar, aculhir qualqu’un, dire d’“òc” e de “non”, etc. Los escolans de 3 a 10 ans tanben an espiat un cort dessenh animat en occitan e an cantat Se Canta, l’imne nacional occitan.
 
Los escolans de l’escòla Diwan de Kistreberzh seguisson lor escolaritat en lenga bretona segon los principis de l’immersion lingüistica. Los de la mairala tanben an una inciacion al galò, la lenga romanica de la Nauta Bretanha, un quart d’ora per jorn e totes los enfants an l’ocasion, mai d’un còp per an, d’èsser aculhits a la mediatèca de la municipalitat en anglés. Los grands tanplan an vesitat lo cinèma de Kistreberzh en anglés.
 
Los programas oficials son muts suls pòbles e sus las lengas minorizadas, la còla pedagogica de l’escòla a causit de far descobrir, pauc a cha pauc, de lengas e de pòbles pauc coneguts als escolans. “Al sud de Bretanha existís un pòble amb una lenga que s’estend per de nombroses departaments, avèm doncas causit de començar per Occitània e la lenga occitana. L’occitan es la sola lenga minorizada, amb lo yidish, dont una òbra es estada coronada pel prèmi Nobel de literatura: Mirèlha de Frederic Mistral en 1904.”
 
 
 
 
F. Lécuyer