Actualitats
Lo Parlament Europèu per l’escolarizacion en immersion de las lengas menaçadas
La Comission de la Cultura del Parlament Europèu a aprovat que se fomente, a partir dels primièrs nivèls educatius, l’aprendissatge de las lengas minorizadas menaçadas de desaparicion, çò que tanh lo nòstre occitan. La demanda fa partida d’un rapòrt sus diversitat lingüistica dins l’Union Europèa, elaborat per l’eurodeputat còrs François Alfonsi e aprovat a l’unanimitat amb d’emendaments dels diferents grops politics.
Un d’aqueles emendaments foguèt presentat per l’eurodeputada basca Izaskun Bilabo e per l’eurodeputat catalan Ramon Tremosa, e citava “las politicas educativas d’immersion” amb l’efièch qu’an “sus la proteccion de las lengas europèas non egemonicas”.
L’emendament que s’es adoptat, fin finala, considèra que los estats membres de l’UE an de far una policita lingüistica qu’abilite los enfants a “aprene la lenga en perilh, coma la lenga mairala, tre l’edat mai precòça”.
Aquel rapòrt, aprovat en comission, serà presentat en setembre al plen de l’eurocambra per demandar a la Comission Europèa de lo completar amb de mesuras legislativas, en vista de la defensa de las lengas minorizadas en perilh d’extincion, segon çò qu’a comunicat Izaskun Bilbao.
Al delà, lo rapòrt reconeis lo multilingüisme “coma una riquesa e una expression de la diversitat europèa” e demanda de finançament pel periòde 2014-2020 per fin de sosténer las lengas en perilh.
Tanben considèra que las societats que gerisson lo multilingüisme d’un biais democratic e durable contribuisson a la pluralitat, son mai dobèrtas e son en melhoras condicions per contribuir a la riquesa que supausa la diversitat lingüistica.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Benlèu dins 250 ans l'Educacion nacionala francesa se'n avisarà que la via de l'escolarisacion en immersion per las lengas amenaçaas serà a prepausar coma biais d'ensenhament generalisat al Parlament.
Mas d'aicí, lo problèma risca ben d'èstre reglat. Mas farem benlèu ancara de grèc e de latin. Aquò es utile, siguem serioses.
Dins sa genta mansuetuda, lo Partit Occitan de la coëréncia politica, nos explica lo 20 de junh, un pauc lo contrari del 6 de junh a prepaus de las leis francesas, e d'ensenhament ; benlèu que la sorga del parlament europèu es pas pron clara ?
Aquò es l'avís de Parlament europèu mas, e l'excepcion francesa, i avètz pensat? Es tan excepcionala que la polemica amb lo Barroso foguèt sonque sus la cultura e diguèron pas res sul liberalisme a l'estatsuniana que nos van impausar per nos vendre de mèrcas merdicas.
vaqui una mesura o puslèu una directiva europenca que farà l'unanimitat, exceptat dins lei burèus de l'educacion nacionala,onte son mai de 70 OOO fonccionaris que trabalhan dins la pedagogia e lei mots crosats, a l'ENA, qu'investisson totei lei postas d'elegits e d'eminencias de l'ombra e per los que pensan encara que l'anglés dèu èsser la soleta lenga pratica scientifica e cinematica dau mond, après lo francés de segur e lei juocs video
Aquò's una novèlas de las bonas, lo nòstre governament e los nòstres elegits deurián prendre acte e tornar considerar la ratificacion de la carta de la lengas.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari