Lo rapòrt del Fons Monetari Internacional (FMI) sus la situacion de l’economia espanhòla considèra que lo taus de caumatge es “inacceptablament” naut e, per aquela rason, recomanda de completar la reforma del trabalh adoptada pel govèrn de Mariano Rajoy amb de nòvas mesuras, coma baissar lo còst dels licenciaments, per fin de los alinhar amb la mejana de la rèsta dels païses de l’Union Europèa. En mai d’aquò, segon l’FMI, lo mercat del trabalh espanhòl requerís una reduccion del nombre de contractes, deu agrandir l’usatge del nòu contracte permanent e redusir lo marge d’interpretacion judiciària dels licenciaments objectius.
 
Lo Fons Monetari considèra que la reforma del trabalh deu anar mai luènh per generar d’emplec; e demanda de far un usatge màger dels nòus instruments per que las entrepresas s’ajusten a las condicions de trabalh dels obrièrs e non als licenciaments.
 
Caldriá tanben melhorar los servicis d’emplec e de formacion per ajudar los caumaires a trabalhar, encara segon l’FMI.