La primièra oposicion metèt en concurréncia l’AS Carcassona e lo SO Avinhon. La discutida se dobriguèt plan lèu e plan nharruda. Avinhon paguèt lo dèime: doas penalitats e un tombat que se revelariá decisiu de l’arrièr jaune e negre lo Jeremi Guiraud. A la 24ena minuta, lo pilar canari Osea Sadrau se lançava, servissiá lo dubertura Russel Aiken, qu’alongava la passa per son alièr Greg Mazard que trapava son centre Toma Barrau a l’interior. Ensag e transformacion. A la 35a, Carcassona ramassava dins sos 20 m una pauma provençala perduda, lo segonda linha Tyrone pau navegava dins la defensa provençala e Greg Mazard arribava a nautor per faire parlar sa punta de vitessa: 15-0 a la pausa pels Carcassoneses. A la represa, Greg Marad interceptava dins sos 20 mètres e s’enfugissiá coma perseguit per 13 diables. Ensag e transformacion de Guiraud: 21-0. Mas la partida èra pas plegada. A l’ora de jòc, lo centre Mataka lo remembrava als audencs amb dos ensags en bona posicion : 21-12. Darrèr lo tengut, Jonatan Som lançava dins l’ais lo segonda linha Florenç Roanet qu’arribava a la vitessa d’un Airbus sus la pista de Blanhac per s‘anar amorrar entre los pals: 27-12. Avinhon refusava de plegar e lo talonaire Bonnet marcava a son torn: 27-18. Hillen panava una pauma a un contra un e en cap de linha, Super-Greg Mazard tornava marcar: 31-18. demoravan sèt minutas a jogar que foguèron plan longas pels Lengadocians que poguèron pas arrestar Tamghart e Durandal. Amb las transformacions de Kelly, Avinhon tornava a un punt: 31-30. Los Provençals temptavan lo tombat per anar en prolongacion; lor darrièra cadena s’acabava sus un en-abans: los jaune e negre podián levar los braces cap al cèl mas son elis que se son ganhats a la nhaca e a la solidaritat lo dreit de tornar en finala vint ans aprèp.

 

Tant engatjada mas sus un autre ritme se debanèt la quatrena confrontacion de l’an entre Pià (venceire los tres còps) e lo campion sortent, Lesinhan. Una partida intensa ont cadun ensagèt de faire plegar per la fòrça l’adversari tot en comptant sus quauque estratagème de sos menaires de jòc. Los catalans perdián lo mesclanha Porter a la mièja-ora de joc amb los caissals en farineta, mas Antòni Carrère lo remplaçava al pè-levat. A la pausa, la marca èra d’egalitat a 8 pertot: un ensag de Carrère e un de l’inevitable Maxime Gressèque pels Catalans, un ensag de Duggan amb la trasformacion e una penalitat de Wynn per la còlha de Corbièras. Malgrat una meravilha d’ensag de Duggan, Lesinhan anava acabar per baissar los braces. Moly replicava a l’arrièr verd e blanc. Puèi, Pià metiá a profit un carton jaune pel pilar lesinhanés Leulai per marcar per Soubeyras. Gressèque ajustava la tarnsformacion e una penalitat: 22-14 pels Catalans. Kane Bentley entreteniá l’esper amb un tresen ensag pels occitans a tres minutas de la fin, mas èra tròp tard. E tant qu’a i èsser, a la còrna, Antòni Carrère raubava la pauma a Nicolau per puntar e clavar la partida sus un 28-20.

 

I aurà pas de quinquennat per Lesinhan e serà una finala de Campionat originala que se debanarà aqueste dissabte 12 de mai a Narbona entre Pià e Carcassona sul còp de tres oras del vèspre. Una partida dobèrta qu’es malaisit de faire un pronostic segur. En dobertura, a una ora manca un quart, lo titre dels juniòrs se jogarà entre Lesinhan e l’AS Carcassona. E òc, dimenge, sus l’estadi Mazicou d’Albi, lo FCL a escartat Avinhon: 40-26 e Pià a pas fait un plèc fàcia als joves canaris : 50-12.

 

Per que la dimenjada siá completa, dissabte en fin de vèspre, onze mila espectators emplenèron l’estadi Brutús per veire los Dracs fàcia als Gigants d’Huddersfield, cap de fila del classament de Super-Liga. Lo partida tenguèt totas sas promessas: a la pausa, los sang e aur, menavan 14-12. A la represa, perdián lor menaire de jòc Scott Dureau tocat al ginolh. A cinc minutas de la fin, Huddersfield tornava a nautor dels Catalans a 20 pertot, mas Tomas Bòsc ensacava lo tombat abans un ensag de Dupòrt dins la darrièra minuta. Amb la transformacion de Bòsc, lo planchòt s’atudèt sus la marca de 27 a 20 pels locals.

 

Dimenge, plaça a la Cup e pel compte dels quarts, los Dracs auràn lo plaser de reçaupre sul còp de 4 oras del vèspre los Lops de Warrington. Per èsser complets, vos direm que, dimenge, sus la pelena de Pià, Sauvaterra de Comengés venguèt campion de Nacionala 1 fàcia a Ornasons 28-4 alara que Ferrals de las Corbièras ganhava la Copa Falcou (Copa de las equipas de Federala) contra Salon de Provença : 40-24 Aqueste dimars 8, se tendràn a Carcassona, las finalas de la competicion feminina entre Lescura d’Albigés e Factura en division 2 e entre Tolosa-Ovalia e Marselha en Division 1.

 

La retransmission en dirècte e en occitan de la finala Pià-Carcassona vos serà contada per Alan Roch e Ivon Català sus las ondas de Ràdio-Lenga d’Òc-Narbona aqueste dissabte 12 a comptar de 3 oras del vèspre (95,5 mhz dins la zòna d’escota o sus www.lengadoc.eu) que difusarà tanben una cronica " Narbona, capitala del tretze " (del 9 al 20 de mai).

 

 

Alan Roch