Pendent las darrièras setmanas, los mèdias an seguit amb interès las protèstas d’indignats que se son debanadas en Turquia e en Brasil. Per contra, s’es donat pauca atencion a la nomenada “Bebolucija”, la “Revolucion dels Nenets” en Bòsnia e Ercegovina. Pel primièr còp dempuèi la fin de la guèrra en 1995, de milièrs de bosnians de totas las comunautats se son acampats cada jorn davant lo parlament, a Sarajevo, en protèsta contra un conflicte politic que dempuèi de meses empedís los novèlnats del país d’obténer un passapòrt. Amb de consequéncias tragicas.
 
Dempuèi la mitat de febrièr, la Republica Sèrba, l’entitat semiindependenta dins l’estat federal de Bòsnia, pretend obténer pels sieus nenets de numèros d’identificacion diferenciats dels de la rèsta del país. Aquela intencion a creat un blocatge legislatiu qu’empedís totes los nenets d’obténer lo passapòrt. Pels deputats croats e bosnians, s’agís d’una manòbra per crear la division e condusir a l’independéncia de la partida sèrba.
 
E aquò o pagan los enfants nascuts dempuèi febrièr: sens numèro d’identificacion al certificat de naissença, an pas l’accès a la seguretat sociala ni pòdon aver de passapòrt.
 
 
Doas mòrts
 
La situacion a agut de consequéncias tragicas. Belmina Ibrišević, nascuda amb una malautiá grèva, obtenguèt pas lo permés de sortir del país e seguir son tractament en Alemanha. Al començament de junh, quand aviá tres meses, moriguèt a Sarajevo, ont cap d’espital aviá los mejans adaptats per la salvar.
 
Es pas estat lo sol cas: lo 13 de junh passat, Berina Hamidović, una autra dròlla bosniana malauta e sens papièrs, moriguèt dins la capitala sèrba, Belgrad, ont sos parents avián capitat de la menar en veitura après superar de longas negociacions amb los agents de la doana.
 
 
Mobilizacion nacionala
 
Belmina e Berina son vengudas lo simbòl de la lucha, que s’es agrandida enòrmament. I a agut de manifestacions cada jorn davant lo parlament a Sarajevo, malgrat la proïbicion del govèrn: dimècres passat acampèron aperaquí dètz mila personas de totas las comunautats del país, atges e sectors, per reclamar la fin del desacòrdi politic e de la division etnica e nacionala.
 
La mobilizacion, que comencèt a travèrs de rets socialas coma Facebook, es venguda una revendicacion de cambiaments prigonds dins lo país e de denóncia dels politicians, e s’es estenduda dins qualques vilas de Bòsnia e Ercegovina.