Dempuèi l’aterratge del robòt Curiosity sus Mart, fa gaireben un an, la NASA a obtengut un molonàs de fotografias de la superfícia de la Planeta Roja. Mas ara ven de ne publicar una de fòrça especiala: s’agís de la fotografia panoramica mai detalhada fins ara, amb una resolucion d’1,3 miliards de pixèls. S’agís, de fach, d’una composicion de gaireben nòu cents fotogramas captats pel veïcul d’exploracion Curiosity en octòbre e novembre passats.
 
La fotografia ofrís una vision a 360 gras de la zòna nomenada Rocknest, al fons del Cratèr Gale, fins al Mont Sharp a l’orizont.
 
Bob Deen, creator de la fotografia, a soslinhat qu’aquò demòstra las capacitats de las camèras de Curiosity, que “permeton de veire l’entorn del veïcul e de sarrar l’imatge per descobrir de detalhs fòrça fins”.