La Cima dels Pòbles reclama a Cristina Fernández una amassada per tractar las revendicacions dels pòbles originaris. Tant qu’aquela reünion se debane pas, los indigènas se mobilizaràn cada setmana. Lo prèmi Nobel Pérez Esquivel reclama al govèrn argentin que “respècte” los “dreches dels pòbles”, que “son tanben de dreches umans”.

Los pòbles autoctòns d’Argentina, amassats jol parapluèja de la Cima Nacionala dels Pòbles e Organizacions Indigènas, menan a tèrme una mobilizacion dempuèi lo començament de junh per revendicar la restitucion de lors tèrras ancestralas. Segon lo jornal argentin Clarín, las protèstas demandan tanben de melhoraments sanitaris entre las comunautats autoctònas e la fin dels “deslotjaments dels territòris, de las persecucions, de la judiciarizacion e de las mòrts dels militants” indigènas.
 
La seguida de las mobilizacions se decidiguèt al començament de junh, en una amassada de representants de pòbles indigènas dins la província de Formosa, al nòrd d’Argentina. Las protèstas se son convocadas per tot lo país, mai que mai sus la Plaça de Mai (Plaza de Mayo), a Buenos Aires, cada dimècres. L’objectiu dels representants indigènas es d’èsser recebuts pel govèrn que lo dirigís Cristina Fernández. Se lo 3 de julhet i a pas cap de responsa, poirián decidir de menar a tèrme de mobilizacions mai intensas.
 
Demest los pòbles representats dins la mobilizacion, i a los originaris de Formosa (qom, pilagá, wichi e nivaklé), ont lo movement comencèt, e tanben d’autres establits dins la rèsta del territòri argentin, coma los mbyas guaranís, los mapuches o los kolles, per ne citar qualques unes dels mai nombroses. La territorialitat es un dels aspèctes mai importants de la lucha d’aqueles pòbles. La reünion de Formosa serviguèt a metre en relèu l’oposicion d’aqueles pòbles a l’indústria extractiva dins lors territòris ancestrals e per ne revendicar la proprietat. Significativament, un dels lèmas que dirigiguèt l’amassada foguèt “La tèrra raubada serà recuperada”.
 
Un dels sostens qu’an obtengut los indigènas dins aquela mobilizacion es estat lo del prèmi Nobel de la Patz, Adolfo Pérez Esquivel, qu’a remembrat que “los dreches umans son tanben de dreches dels pòbles, e devon èsser respectats”. Pérez Esquivel a reclamat a Fernández qu’autrege una audiéncia amb los representants indigènas e que remembre que govèrna “pels 40 milions d’argentins”, compreses aqueles que son de membres dels pòbles originaris.

 
 
 
 
 
 
 
 
 
 
Aqueste article ven del jornal catalan Nationalia.cat, amb qui Jornalet a un acòrdi de cooperacion.