Actualitats
Lo sol territòri de l’estat francés que deportèt pas de josieus foguèt Corsega
Una associacion josieva vòl far reconéisser Corsega coma “Illa dels Justes”
Ara que qualques sectors del nacionalisme francés ensajan de presentar los còrses coma de racistas en aprofechant qu’an un prigond sentiment identitari, lo jornal catalan Nationalia rapòrta qu’o son pas brica, justament a prepaus dels josieus. Una associacion josieva vòl reconéisser Corsega coma Illa dels Justes.
L’associacion Omenatge als Vilatges de França (HVF segon sa sigla en francés) ven de far saber que Corsega es lo sol territòri de l’Estat francés que los josieus i foguèron pas percaçats. Cap de josieu —levat un que foguèt capturat accidentalament— i foguèt pas deportat malgrat los òrdres del regim de Pétain, collaboracionista amb lo nazisme alemand. L’associacion HVF amassa de descendents de las familhas josievas de l’estat que se salvèron de l’exterminacion pendent la Segonda Guèrra Mondiala.
Lo jornal Jerusalem Post explica qu’una primièra reconeissença oficiala de Corsega coma tèrra d’aculhiment e de salvagàrdia dels josieus se debanèt en octòbre de 2010, quand l’associacion HVF prepausèt l’illa a l’entitat Yad Vashem. Ça que la aquela entitat diguèt que sas distincions se donavan solament a de personas individualas.
A l’ora d’ara HVF a tornat far la demanda en especificant que vòlon far aquela reconeissença almens al vilatge còrs de Canari, un dels referents emblematics. L’istòria tanben se presenta dins un documentari que France 5 l’a emés recentament.
Los detractors dison qu’en Corsega i aguèt tanben de collaboradors del govèrn de Pétain, mas divèrses testimoniatges amassats per HVF afirman que la solidaritat dels còrses amb los josieus foguèt dominanta dins tota l’illa. La solidaritat amb los josieus representa pas una excepcion; mas s’agís d’un cas que demòstra plan que los còrses reconeisson coma còrses totas las personas que s’i vòlgan identificar, al delà de las diferéncias de cadun. Los josieus còrses èran considerats, simplament, coma de còrses e coma tals foguèron dignes de la solidaritat absoluda davant tota accion que los discriminèsse.
Aquela actitud seguís una longa tradicion istorica. Pasquale Paoli e quitament Napoleon foguèron favorables a donar un estatut de ciutadan de plen drech a totes los josieus que demoravan dins l’illa, los que s’exilièron après las percaças de l’Euròpa continentala del sègle XVI enlà.
Cal soslinhar qu’en 1915, 800 josieus expulsats de l’Empèri Otoman foguèron fòrça ben aculhits en Corsega, coma o remembra lo jornal de la vila santa. Un gèst compensat per la rapiditat d’integracion d’aqueles josieus; e sens quitar d’o èsser, venguèron plenament de còrses.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#3 Audrey Tautou a pas jamai jogat sos ròtles d'actritz, en s'apevant subre de teorias istoricianas de las jacobinassas, obèrtament desvalorantas per la cultura occitana, e que n'ai ieu lo confle… Audrey Tautou a d'engenh artisitic e d'Occitània, se'n chauta tranquilament.
Mentre qu'un istorian de l'escòla d'istòria francesa denega tot çò que poiriá permetre d'identificar Occitània coma un objècte d'estudis, coma un projècte nacional, mens encara coma una reivindicacion politica legitima. Se o reprocham a de gents aital, nos respondràn qu'aquò's de neutralitat ideologica necessària al debanament del mestièr d'istorian.
Traduccion : èsser favorable a una "France éternelle, une et indivisible", aquò's de neutralitat objectiva. Li èsser pas favorable, aquò's de subjectivisme partisan. Contràriament a l'Audrey Tautou que demanda pas res a degun, me fa mal, personalament, d'ausir propagandistas aital qualificats de "cevenòls"… Culturalement, aquelas gents son negativas, agressivas, propagandistas franchilmandas e doncas, fin finala, pas mai scientificas que los que se'n pretendon adversaris : los occitanistas.
#2 Vertat que Cabanel es pas occitanista, mas revendica son origina cevenola, ne fasiai doncas mencion (coma o faria el). E coma dins Jornalet se pot legir de causas coma "l’actritz occitana Audrey Tautou" (que clama pas son occitanitat...), me disiai que la sola naissença podia servir a qualificar de cevenol lo Cabanel. Aquo dich, lo podèm dire "francés", "europenc", "bosniac" o "pigmé", que ne fariai pas una malautia. Bona jornada.
#1 Patrick Cabanel, istorian cevenol ? De Segur, per las Cevènas, aquel ideològue propagandista de la lenga e de la cultura unica franchmanda per tota Occitània i es nascut. Mas de la cultura e de la lenga de sos aujòls, "parpalhòts" coma los mieus o pas, per lo conèisser l'aver encontrat, vos pòdi assegurar que se'n chauta bravament, coma una ablacanta majoritat de sos collègues istorians de l'universitat francesa. Cabanèl non es un istorian cevenòl : es un istorian francés, ni mai ni mens. Cossí dison, la curatalha ? « Se reconeis un arbre a sas fruitas », non ?
Aquò dit, subre lo sicut "dels justes" aquò enlèva pas res a la portada ni a la valor de las informacions que s'i referís Manu Isopet, que saludi frairalament.
Osca d'aver pas deportat cap de josius. Mas un cop de mai l'utilizacion de l'istoria me fa dol.
"lo sol territori de l'Estat francés que deportèt pas de josius"...
I aguèt tanben plan pauc de josius deportat en Bretanha : n'i avia gaireben pas.
N'i aguèt pas tanpauc en Guiana francesa.
Cal remembrar que Corsega foguèt pas tanpauc ocupada per l'armada alemanda mas per l'armada italiana (levat 4 meses de ont los alemands venguèron ensajar de barrar la rota als aligats) e que los italians èran pas los mai ferrotges dins la politica anti-josiva. En mai l'Isla foguèt liberada rapidament.
Legir sus aqueste sicut "Histoire des Justes" del Patrick Cabanel, istorian cevenol.
" Los detractors dison qu’en Corsega i aguèt tanben de collaboradors del govèrn de Pétain". Es tanben una realitat , coma pertat. Denega pas los actes bons e coratjoses dels autres.
"s’agís d’un cas que demòstra plan que los còrses reconeisson coma còrses totas las personas que s’i vòlgan identificar, al delà de las diferéncias de cadun. Los josieus còrses èran considerats, simplament, coma de còrses". Polida frasa. Solide qu'es l'expression d'una part dels corses, mas pas de totes. L'actitud fàcia als Pè-negres o al Magrabins foguèt/es pas totjorn dins aquela dralha de pensada.
Per conclure, soi d'acordi de luchar contra los que dison "los corses son racistas". Cap de grope uman a pas lo privilègi del racisme, cap de grop uman pot dire que coneis pas lo racisme. Mas utilizar l'istoria (aquela istoria) per o justificar me geina. Per préner un exemple que coneissi un pauc, Moissac, en Carcin-Bas, alberguèt pendent la guèrra de centenats de mainatges josius, que tota la populacion sabian josius, que cambièron totes de nom pendent la guèrra en demorar dins la meteissa escola, e degun diguèt pas res. Aquo significa que los moissagueses son mens racistas qu'endacom mai? Non, ni mai, ni mens. Lo Front Nacional i fa mai de 25%, es la segonda força politica votada pels moissagueses en 2012.
La gloria del pepin es la sieuna sola ; se transmet pas sus sèt generacions.
Aquo dich, osca als Corses de 1940-1943 que salvèron lors fraires umans.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari