Doas associacions denóncian una descreissença organizada de l’ensenhament de l’occitan e an remés una peticion al rectorat de l’Acadèmia de Niça. “La fòrta demanda de corses d’occitan es descoratjada per las administracions”.

“Mantes escolans a Niça, en 15 ans d’escolaritat, recebon pas jamai la mendre informacion sus las possibilitats d’aprene en niçard, e mai s’aquela possibilitat existís dins lor establiment”, çò planhiá a Aquò d’Aquí Fany Peretti, representanta d’Òc Bi, l’associacion d’encastre nacional occitan que representa los parents d’escolans d’ensenhament bilingüe.
 
Aquela associacion, amb Niçard per Totjorn (escrivon Nissart per Tougiou), depausèt ièr, dimècres 26 de junh, una peticion al rectorat de l’Acadèmia de Niça. La rectritz, Claire Lovisi, a pas jamai respondut a las nombrosas demandas de rendètz-vos d’aquelas associacions.
 
La peticion protèsta contra una situacion d’organizacion de la descreissença de l’ensenhament en occitan, una practica tanben denonciada per l’APRL, una associcion qu’agropa los ensenhaires d’occitan.
 
Aquela manca de volontat de l’administracion se tradusiriá dins cèrts sectors, entre Niça e Grassa, per la descreissença importanta del nombre d’escolans que presentan l’espròva d’occitan al bachelierat.  “Al Pargue Imperiau, per exemple, a Niça, a l’intrada en segonda, los escolans sabon que l’ensenhament de l’occitan cessarà tre la primièra. Alavetz s’inscrivon pas”, çò disiá Patrici Arnaudo. De son costat, Peretti citava lo cas dels licèus Estienne d’Orves e Bèu Sit, ont los dos corses d’occitan son estats simplament fusionats, amb reduccion dels nombre d’oras d’ensenhament del niçard.
 
 
Sostens
 
Los suportaires del club de fobtòl OGC Niça sostenon la peticion. “Lo club Popular Sud nos a donat un còp de man en presentant lo tèxt dins las tribunas”, çò disiá Peretti.
 
Lo Centre Culturau Occitan-País Niçard e Aupenc sosten tanplan l’iniciativa.
 
Cal soslinhar qu’aquela peticion arriba après lo vòte de la Lei de Refondacion de l’Escòla. Segon aquela lei, los establiments son obligats de provesir “una informacion a lor public sus la lenga regionala prepausada”.