La Cort Suprèma estatsunidenca a declarat inconstitucionala la Lei de Defensa del Maridatge de 1996 (lei ADONDA), que ditz que la definicion del maridatge se limitariá a l’union entre un òme e una femna e que, doncas, los parelhs formats de doas personas del meteis sèxe aurián pas drech a cèrts beneficis federals.

Per cinc vòtes contra quatre, la Cort Suprèma a donat rason a Edith Windsor, d’84 ans, qu’après quaranta ans de relacion amb sa femna, Thea Spyer, amb qui se maridèt en 2007; e se trobèt qu’un còp veusa, li caliá pagar mai d’argent per poder recebre l’eiretatge. A Windsor li apliquèron la lei ADONDA, aprovada jos la presidéncia de Bill Clinton, e que resèrva mai de mila dreches federals en matèria de taxas, pensions o santat als parelhs formats per un òme e una femna. Gaireben dos decennis puèi, lo naut tribunal estatsunidenc dobrís la pòrta per que de milièrs de parelhs omosexuals pòscan reclamar de beneficis fins ara inaccessibles.
 
“Malgrat que lo Congrès aja autoritat per dessenhar de leis en acòrdi amb sa concepcion de la politica nacionala, pòt pas negar la libertat protegida per la clausula del procès degut del cinquen emendament”, çò expliquèt lo magistrat pòrtavotz, Anthony Kennedy. Dins aquel sens, a assegurat que lo fach que qualques personas maridadas sián mens respectadas que d’autras es una violacion de la constitucion.
 
Pel president dels Estats Units, Barack Obama, lo verdicte representa “un pas istoric per l’egalitat”.