La cort d’assissas dels menors del departament del Naut Léger condemnèt, divendres passat, Matthieu Moulinas, de 19 ans, a la reclusion criminala a perpetuitat pel violament e l’assassinat en 2011 d’Agnès Marin, quand aviá 13 ans, e pel violament precedent d’un autra gojata de 16 ans.

Après una deliberacion de mai de 4 oras, la cort anèt plan mai al delà de las requisicions del ministèri public, que demandava 30 ans de reclusion criminala. S’agís doncas del primièr còp que se condemna a perpetuitat un menor al moment dels faches en Occitània.
 
De son costat, l’avocata generala refusèt d’emplegar l’excusa de minoritat, çò qu’auriá pogut limitar la condemnacion de Moulinas a 20 ans. L’avocata qualifiquèt la personalitat de Matthieu Moulinas d’“ultraperilhosa”, del temps qu’estimèt qu’èra plenament responsable de sos actes. Se mostrèt pessimista tocant d’oportunitats de melhorament, en jutjant necessari d’evitar “de nòus dramas”.
 
Après l’enonciat del verdicte, las partidas civilas mostrèron lor satisfaccion e tanben un cèrt estonament davant la dura pena infligida.
 
L’avocat de la familha d’Agnès se mostrava content per la pena, “a assassin fòra nòrmas, verdicte fòra nòrmas”, çò manifestèt, mentre que considerèt que “la jurada a volgut escartar lo murtrièr d’Agnès per que pòsca pas cometre un novèl crime”.
 
De son costat, Frédéric Marin, paire de la victima, se regaudissiá en disent qu’“èra important de metre aquel individú a la sosta de tota temptacion. La sola certitud es qu’es estat alonhat”.
 
Los parents de Matthieu Moulinas, clarament ensucats pel verdicte, sortiguèron de la sala d’audiéncia sens dire pas un mot. Los avocats del jove condemnat faguèron pas cap de declaracion, e a l’ora d’ara sabèm pas se faràn apelacion.
 
L’actitud de Matthieu Moulinas pendent tot lo procès foguèt de menfotisme, “completament absent que mòstra pas cap d’empatia”, çò diguèt la maire d’Agnès.
Divendres de matin, pendent tot lo requisitòri, restèt prostrat, lo cap dins los genolhs dins lo compartiment dels acusats. Mostrèt pas cap de reaccion quand comuniquèron la pena. De fach aviá ja refusat de s’exprimir après la defensa de sos avocats.