Lo Foreston, aqueu domeni de 25 ectars en riba dau Laus de Sèrreponçon, lo segond laus artificiau d’Euròpa, e actualament proprietat dau conseu generau de las Autas Aups, deu aculhir un projècte de complèxe toristic. Es menat per la societat Goebli que sas activitats son lo textil dins lo nòrd de França e lo torisme en Occitània. Aüra es en espèra de la revision dau plan locau d’urbanisme (PLU) de la comuna dau Sause dau Laus (Ambrunés).
 
Deu enclaure notament una residéncia seniors de 80 lotjaments, una residéncia de torisme d’estiu e d’ivèrn, una ostalariá e un restaurant dubèrts tota l’annaa. Deu aculhir egalament un centre de seminaris e un espaci de balneoterapia. D’autras activitats seràn prepausaas als residents amb las estacions d’ivèrn dels Uèris e de Realon, los espòrts nautics dau laus, las plaias ò en liam amb los sites patrimoniaus coma l’Abaiá de Nòstra Dòna de Boscodon.
 
A l’origina se deviá implantar un pòl d’entrepresas liaas als mestiers de las nòvas tecnologias de l’informacion e de la comunicacion, mas fauta d’interessats, lo projècte chambièt e devenguèt de tòcha toristica. La zòna deu aüra èstre classaa coma toristica e deu emplir las constrenchas liaas a l’aplicacion simultanèa de las leis litorau e montanha. Lo dorsier es en mans de la còla municipala de la consolessa dau Sause, Valérie Grenard. Una pechòta part dau Foreston depende egalament de la comuna vesina dau Pontís situaa en fin de la valaa d’Ubaia dins las Aups d’Auta Provença.
 
Lo còst totau apròcha los 31 milions d’èuros que son finançats per la venda d’una part de residéncias seniors, una part de residéncias de torisme, un pool bancari e per de capitaus dau grop Goebli.
 
La dubertura es prevista per 2015. Lo complèxe que s’apelarà “Bayle Coste du Lac” serà barrat a las veituras, fòra un vintenau de veïculs electrics. Dubèrt per tot l’an, lo conseu generau còmpta amb la creacion d’emplecs sasoniers coma duraïsses per lo país.
 
 
 
 
Laurenç Revèst