Lo govèrn d’Aran òpta per las publicacions numericas pr’amor de la crisi economica. Las publicacions del Conselh General d’Aran seràn totas cargadas sul sit publicacions.conselharan.org, e d’aquí se’n pòt far difusion, las se pòt descargar o estampar. Las edicions de papièr se faràn per comanda amb lo nombre d’exemplars que se demande. Aital o anoncièt diluns passat lo cap de la Politica Lingüistica del govèrn d’Aran, Jusèp-Loís Sans.
 
Sans presentèt las novetats de las edicions d’ongan: un estudi complet sus las campanas de la Val d’Aran, un estudi istoric sul ròtle de frontièra d’Aran, un roman, una òbra de teatre revirada del catalan, un conte illustrat, e l’Istòria d’Aran facha per un grop de professors. Al delà, se presentèt tanben los libres d’estudi e los libres escolars de lectura.
 
Lo sit web de las edicions aranesas fa tanben difusion d’archius musicals e de quasèrns de divulgacion de la Val d’Aran.
 
Amb aquela nòva politica de publicacions, en mai d’estalviar en estampatge e emmaganizatge, s’atenh una difusion mai granda, e las edicions del govèrn d’Aran pòdon arribar plan dins Occitània tota.