L’escòla primària publica del Gand dins lo sud de la comuna ven de barrar sas pòrtas e farà pus jamai de rentraa en setembre, segon d’informacions de La Provence. Ansin es la decision de l’Educacion Nacionala.
Bastia amb lo quartier residencial per los besonhs de sos joines estatjants, entre Durença e lo centre vila, aüra l’escòla renovèla pus sa populacion escolara. La populacion d’encuei majoritàriament compausaa d’estatjants sensa enfants —principalament de retirats— fai que los escolans que rèstan seràn repartits dins las escòlas vesinas.
L’establiment escolar sisteronenc es lo tresen a barrar après l’Escòla del Paresós e l’Escòla del Bosquet. La barraüra d’aquela tresena escòla pausa la question de la vivacitat sociala, doncas economica, d’aquel caire dels Aups d’Auta Provença. Una baissa dels emplecs es mens d’actius, mens d’actius es mens d’enfants escolarizats e una escòla que barra. Es l’efiech de la sèrp que se mòrd la coa.
En febrier passat, l’escòla de Valèrna èra notaa per l’inspeccion academica sus la lista de las barraüras projectaas. Aquela escòla es dins un rechampament pedagogic intercomunal (RPI) amb los escolans de Sigoier, Vaumelha, Tesa. Elegits e parents se mobilizèron per mantenir aquela classa de nivèl CM1-CM2 d’aqueste RPI.
Laurenç Revèst
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari