Fins ara, la jurisdiccion militara espanhòla se limitava al domeni estrictament militar, als ipotetics estats de sètge e als faches que se debanan en tempses de guèrra. Mas segon la propòsta del nòu còde penal militar, que lo publiquèt lo jornal espanhòl El País diluns passat,  lo govèrn espanhòl a modificat aquel darrièr concèpte: ara es pas mai “en temps de guèrra”, mas “en situacion de conflicte armat”.
 
Pasmens, aquel nòu còde penal militar especifica pas çò que se deu comprene per conflicte armat.
 
“En situacion de conflicte armat”, quina persona que siá, que difonda d’informacion d’interès militar e “que prejudique la defensa d’Espanha o de sos aliats”, un tribunal militar la poirà acusar de traïson e la condemnar a vint ans de preson; e quin civil que siá que desobesisca a un ban militar poirà èsser condemnat a sièis ans de preson, çò explica lo jornal.
 
Aquela nòva arriba dos jorns après lo concèrt reüssit per l’independéncia de Catalonha que se debanèt dissabte a Barcelona.