L’eurodeputat flamenc de l’Aliança Liura Europèa-Verds, Mark Demesmaeker, denocièt dimars passat, al Parlament Europèu d’Estrasborg (Alsàcia), que lo govèrn espanhòl neguèt a una delegacion d’aquel parlament la possibilitat de vesitar Arnaldo Otegi a la preson de Logronh la setmana passada. Segon çò qu’a explicat Demesmaeker, lo 26 de junh viatgèt al Bascoat per vesitar “un dels presonièrs politics mai remarcables”. Dins son intervencion, l’eurodeputat flamenc ensenhèt lo numèro de presonièr e diguèt: “A una cara e un nom: Arnaldo Otegi”.
 
Demesmaeker expliquèt qu’un grop d’eurodeputats envièt una sollicitud per escrich a las autoritats espanhòlas per poder vesitar Otegi en la preson de Logronh, mas “jamai recebèrem cap de responsa”, çò diguèt. Dimècres passat se desplacèron fins a la preson e lor neguèron la vesita.
 
“Lo tractament qu’avèm recebut de las autoritats espanhòlas es escandalós. Per aquò, m’agradariá de demandar al Parlament Europèu qu’atirèsse l’atencion del govèrn espanhòl per sa manca de respècte del trabalh dels eurodeputats”, çò diguèt Demesmaeker.