Es vesins e vesies dera localitat de Les (Val d’Aran) an realizat un lipdub ath long des carrèrs deth pòble eth passat 30 de junh entà convidar a redescurbir es sòns cornèrs e secrèts ath torisme, eth principau motor economic deth territòri qu’a sofrit ua accentuada queiguda dempús deth malerós 18 junh, dia des inondacions.

Er enregistrament deth lipdub auec lòc era jornada següenta ath barrament des hèstes de Les, dia de Sant Pèir, a on es vesins quilhèren eth nau Haro, simbèu culturau dera vila aranesa, ena plaça deth pòble. A mieja tarde, tota era poblacion s’amassèc deuant er Ajuntament entà distribuïr es desparièrs ròtles qu’aurien en vidèo musicau.
 
Eth lipdub partís damb ua recreacion des inondacions damb damb clicks de playmobil e visite desparièrs punts dera vila a on es vesins mòstren es sòns diuèrsi atractius: espòrts d’aventura, coma eth rafting e era escalada; auviatge culturau, ja siguen balhs, arquitectura o teatre aranesi; productes e servicis locaus, coma eth caviar e es banhs termaus; e es sues gents, entre un pialèr de possibilitats, coma eth BTT, eth running o era recuelhuda de misharnons. Era produccion finalize damb tota era poblacion amassada en un reclam generau as pès deth Haro.
 
Era musica deth vidèo tanben ei un simbèu caracteristic dera Val d’Aran donques que se tracte de cançons interpretades damb estruments tradicionaus e votzes ena lengua deth país.
 
Dempús des inondacions deth passat 18 de junh, eth territòri aranés a recebut un còp dur. Eth tresau sector ei clau ena economia dera zòna e era sua recuperacion ven fòrça còsta ensús. Es resèrves en otèls e campings a pena entren e es restaurants e comèrci locaus sofrissen pèrtes importantes. Entà aparià’c, es vesins d’aguest pòble deth Baish Aran vòlen qu’aguesta crida servisque entà tornar a aumplir de toristes es carrèrs de Les e de tota era Val d’Aran.
 
 
 
 
Iñaki Delaurens
Mireia Boya