Mentre que los mèdias an seguit amb atencion las protèstas que se son debanadas en Turquia o en Egipte, sembla que las protèstas que se debanan en Bulgaria dempuèi qualques setmanas contra lo govèrn son a passar desapercebudas.

De milièrs de bulgars comencèron de manifestar per las carrièras de las principalas vilas del país lo 14 de junh, e encara son a protestar. Comencèron de protestar contra la nominacion polemica de Delian Peevski, entrepreneire e membre del Parlament, coma nòu cap de l’Agéncia Estatala de la Seguretat Nacionala. L’indignacion publica menèt fin finala a l’anullacion d’aquela decision, mas las manifestacions contunhan.
 
Los bulgars an pas quitat las carrièras e exigisson de reformas per que i aja mai de transparéncia dins la vida publica del país, ont, segon los manifestants, los nivèls de corrupcion son fòrça nauts. Lo govèrn, al poder dempuèi un mes, agís pas d’un biais transparent e es somés als interèsses de l’oligarquia dels grands entrepreneires, segon çò que dison los manifestants, que jorn après jorn prenon las carrièras per cridar: “Demission”, “Porcariá roja” e “Màfia”.
 
Las manifestacions se veson fòrça nombrosas mas sabèm pas gaire lo nombre de manifestants, pr’amor qu’aquela donada es mespresada pel govèrn e pels mèdias del país.
 
Lo partit del Govèrn, Ciutadans pel Desvolopament Europèu de Bulgaria (GERB), foguèt elegit en d’eleccions anticipadas celebradas en mai, après que lo govèrn populista, que teniá lo poder, demissionèt. Ça que la, lo GERB a sonque la mitat dels sètis dins lo parlament bulgar e ten lo poder amb lo sosten d’un partit nacionalista.