L’engenhaire estatsunidenc Douglas Engelbart (Portland, 1925), visionari e inventor de la mirga d’ordenador, moriguèt dijòus de matin a 88 ans. Engelbart faguèt, lo 9 de decembre de 1968, la primièra demostracion publica d’una invencion que cambièt la relacion dels umans amb los ordenadors: la mirga. Dins aqueste vidèo podètz veire que la primièra mirga èra fòrça mai rudimentària que las que se pòdon crompar uèi: èra de fusta, fòrça granda, cairada e aviá un sol boton, mas complissiá sens cap de problèma la foncion de menar lo cursor a quin luòc que siá de l’ecran.
 

Quaranta cinc ans de mirgas
 
D’aquela primièra mirga, fa ja quaranta cinc ans. Engelbart voliá que los ordenadors ajudèsson los umans a èsser mai intelligents, eficients e productius, e la siá recèrca anava en aquela direccion en una epòca que la màger part de las gents pensavan que los ordenadors servissián solament a tractar d’operacions matematicas complicadas. A la presentacion que faguèt en 1968 a San Francisco (vejatz-la en vidèo), voliá ensenhar lo foncionament de l’Online System (NLS), que permetiá d’emplegar l’ordenador per escriure e editar de tèxtes facilament; prevesiá la collaboracion en ret e las videoconferéncias, emplegava l’ipertèxt e compreniá un objècte plan estranh que nomenèt mirga (“mouse”). Amb aquela demostracion, Egelbart prenguèt de decennis d’avança vèrs los ordenadors actuals.
 
L’inventor de la mirga foguèt un visionari, coma se pòt veire dins los vidèos d’Invisible Revolution, un sit web consagrat a documentar las idèas revolucionàrias d’Engelbart. L’engenhaire vesiá las possibilitats dels ordenadors per l’usatge quotidian quand n’avián solament las universitats, los burèus del govèrn e los centres de recèrca. Trabalhèt en una institucion precursora de la NASA, l’Ames Research Center, e s’engatgèt dempuèi amb ARPANET, un ret precursor d’Internet que l’influencièt. Voliá que l’usatgièr d’un ordenador aguèsse un contraròtle fòrça mai complet de çò que se vesiá sus l’ecran. De fach Douglas Engelbart i soscava dempuèi 1961, e mai se la primièra mirga se presentèt en 1968 e lo brevet se concediguèt dos ans puèi.
 
Lo sistèma NLS èra fòrça flexible e poderós, mas tanben complicat d’emplegar, aviá mai de cinc cents combinacions de claus que servissián a donar diferents òrdres a la maquina e, benlèu, foguèt pas un succès alavetz. Pasmens, fòrça concèptes d’aquel sistèma pionièr son a l’ora d’ara una realitat. La mirga d’ordenador n’es un. E mai se los ecrans tactils son de mai en mai comuns e poirián metre la mirgueta en perilh d’extincion.