Lo tribunal de comèrci de Carcassona tenguèt ièr divendres l’ofèrta de represa del fondador de l’entrepresa Spanghero, Laurent Spanghero, que s’engatgèt a salvar 90 dels 230 emplecs de l’entrepresa agroalimentària menaçada de desparicion après l’escandal de la carn de caval. Lo tribunal “omològa lo plan de cession de la SAS Spanghero al profièch de Laurent Spanghero” e “pren acte de la represa de 90 salariats”, çò ditz lo jutjament.
 
Lo tribunal “pren acte de çò que Laurent Spanghero s’engatja a non cedir los actius pendent 5 ans e a gardar lo personal représ almens pendent dos ans” e apond que “la presa de possession serà immediata”.
 
Laurent Spanghero, dins sos 74 ans, filh d’una familha illustra del rugbi, fondèt l’entrepresa a Castèlnòu d’Arri (Lauragués) en 1970 amb son fraire Claude, abans de la cedir per un èuro simbolic a la cooperativa basca Lur Berri.
 
Dins lo projècte de represa de l’entrepresa, acompanhan Laurent Spanghero, un promotor immobilièr de Narbona e la societat de capital-risc Investeam.
 
La societat Spanghero foguèt designada pel govèrn francés coma un actor màger de l’escandal de la carn de caval. La societat reconeguèt aver vendut de carn de caval coma carn de buòu, crompada per d’entrepresas que fabrican de plats cosinats. Una enquèsta judiciària es encara en cors a París.