Lo “Comitat Consultatiu Per la Promocion de las Lengas Regionalas e de la Pluralitat Lingüistica Intèrna” balharà las siás conclusions a la ministra francesa de la cultura Aurélie Filipetti, aqueste 15 de julhet.

Lo comitat aurà trabalhat prèstament, ja que foguèt creat al mes de març.
 
Interrogat per Jornalet sul nombre e las datas de las sesilhas de trabalh del comitat, e mai sul contengut d’aquelas sesilhas, lo servici de premsa del ministèri de la cultura refusèt de los transmetre al motiu que son pas “comunicables a l’exterior”.
 
Aquel comitat se compausa d’11 sòcis:
   
Es presidit per Rémi Caron, que la siá formacion iniciala èra engenhaire en sciéncias geograficas. Es ara un naut foncionari de l’estat francés. Foguèt prefècte pendent mai d’una annada.
 
Interrogat tanben sul finançament mes a disposicion del comitat, lo ministèri respondèt “qu’a pas donat luòc a cap de despensas levat los còstes de desplaçament”. Sens cap de budget per poder comandar per exemple d’estatisticas o d’expertesas, o anar veire cossí aquela question es gerida dins d’autres estats europèus e se n’inspirar, lo comitat s’es degut acontentar de la sola competéncia dels sieus sòcis.
 
Demòra encara a esperar qualques jorns per poder descobrir aquelas conclusions. Çò que ja se pòt dire, coma las solucions constitucionalas e legislativas son estadas rambadas pel govèrn, es que las proposicions poiràn pas èsser qu’administrativas. De mai, la subrerepresentacion de l’aparelh d’estat dins aquel comitat e lo perfil del sieu president daissan pauc d’espèr que i aja cap de cambiament marcat. E fin finala, quinas que sián las recomandacions del comitat, per fin que vengan una realitat, caldrà que sián mesas en practica per las autoritats de l’estat, segon sa sola volontat.