Mai de trenta personas son mòrtas en Egipte dempuèi divendres, pendent los afrontaments entre detractors e partisans del president reversat, Muhammad Mursi. Los Fraires Musulmans avián fach una crida a un “divendres de refús” e a sortir per carrièras per manifestar contra lo còp d’estat. I sortiguèron tanben los que son contra Mursi, e los afrontaments entre los unes e los autres comencèron après que l’armada tirèsse amb fuòc real contra los manifestants pròMursi, qu’anavan cap al quartièr general ont l’èx-president es detengut.
 
I a agut de mòrts al Caire e tanben dins la vila d’Alexàndria, en mai dels centenats de ferits. Los afrontaments entre los partisans e de detractors del còp d’estat se son alongats pendent tota la dimenjada, amb de pèiras, de fuòcs de Bengala e de balas de petit calibre.
 
D’un autre costat, segon l’agéncia estatala de nòvas egipciana, MENA, lo numèro dos dels Fraires Musulmans, Khayrat Ash Shatir, foguèt detengut e acusat de promòure la violéncia. I a ja d’autres dirigents dels Fraires Musulmans detenguts dempuèi lo còp d’estat de dimècres, que nomenèt president interimari lo cap del Tribunal Constitucional, Adli Mansur.