Qualques membres del Grop Internacional per la Recuperacion d’Avions Istorics (TIGHAR) asseguran que sabon l’endrech ont desapareguèt Amelia Earhart, la famosa pilòta estatsunidenca que despareguèt en julhet de 1937 quand ensajava de far lo torn del Mond sus la linha eqüatoriala. Segon eles, l’enòrme salvament ordenat pel president Franklin D. Roosvelt deschifrèt mal las coordenadas que l’aviatritz donèt per ràdio qualques minutas abans de pèrdre las comunicacions.
 
Segon los membres del TIGHAR, Earhart auriá fach un aterratge forçat e auriá passat los darrièrs jorns de sa vida a l’illa Nikumaroro, un atòl plaçat al mièg de l’Ocean Pacific, uèi dins la Republica de Kiribati. Segon las conclusions de lor darrièra expedicion, e après 23 ans de recèrcas, los membres del TIGHAR an publicat sus lor sit web d’evidéncias que l’avion d’Earhart se trobariá submergit près d’aquel atòl.
 
Lo THIGAR calcula qu’an de besonh aperaquí de tres milions de dolars per realizar l’expedicion definitiva e esclarzir totas las incognitas a l’entorn de l’avion e de la famosa aviatritz.
 
Amelia Mary Earhart foguèt una aviatritz estatsunidenca famosa, pas solament per la nombrosas gèstas que realizèt, mas tanben coma femna. Tant alavetz coma dins los nòstres tempses, las femnas an pas gaire d’escasenças de venir pilòtas d’avions.
 
Earhart, acompanhada per Fred Noonan, voliá far un recòrd dins sa carrièra reüssida coma aviatritz. Mas aquela gèsta capitèt mal quand èra quasi a la fin del long percors. Mentre que subrevolava l’Ocean Pacific, l’avion demorèt sens carburant del temps que perdèt lo contacte per ràdio a causa d’un problèma amb l’antena.
 
L’immensitat de l’ocean e la quantitat de pichonas illas escampilhadas faguèt impossible lo salvament de la pilòta e de son acompanhaire, e mai se lo president estatsunidenc Franklin D. Roosvelt ordenèt de realizar una recèrca exaustiva que costèt mai de quatre milions de dolars de l’epòca. Mas ni los 66 avions ni los 9 vaissèls destinats a salvar l’aviatritz e son acompanaire capitèron. Qualques setmanas puèi, foguèron considerats mòrts e se faguèt l’omenatge pertocant.