La Federacion Espanhòla de Rugbi ven d’empedir la reconeissença internacionala de la federacion de Gibartar. Lo sieu vèto se debanèt pendent la celebracion de l’assemblada generala de la Federacion Europèa de Rugbi a Estocòlme. L’admission de Gibartar obtenguèt 136 vòtes mentre que lo posicionament espanhòl n’obtenguèt 134. La clau d’aquel refús la cal cercar dins los 31 païses que s’abstenguèron; per poder èsser admés, Gibartar aviá d’aténher 201 vòtes.
 
Segon çò qu’a declarat lo secretari d’estat per l’espòrt espanhòl, Miguel Cardenal, “es salutari de verificar que, en aquel cas, s’es pas mesclada la politica amb l’espòrt”. Sabèm pas qual practica aquelas mesclas, mas cal remembrar que, fa pas gaire d’ans, la Federacion Espanhòla de Rugbi empediguèt de la meteissa faiçon la reconeissença de la Federacion de Rugbi de Catalonha.