Naissut en 1931 vèrs Chamalèira, en Limanha, Piare Bonaud (o Piare Bounaud dins sa grafia), es mòrt le 15 d’abriu 2023. Piare Bonaud z-èra un geograf, mas sobretot l’autor de nombrosas òbras en occitan auvernhat dins sa revista Bïzà Neirà (bisa nèira), le fondador d’una associacion controversiada antioccitanista, le Cercle Tèrra d’Auvèrnha, que defend la separacion de l’auvernhat dau domeni occitan, e una grafia pròpria, l’Escritura Auvernhata Unificada, ‘pelada tanben la “grafia bonaldista”. z-Es maitot l’autor dau mai grand diccionari per l’occitan auvernhat, son Nouveau Dictionnaire Général Français-Auvergnat, enquèra utilizat quitament per los occitanistas en Auvèrnha.

A la debuta, Piare Bonaud fuguèt un daus promèirs membres dau tot novèl IEO 63 dins los ans 70, e fondèt le Cercle Occitan d’Auvèrnha en 1970 (que devenguèt le CTA en 1974). z-Èra un membre franc actiu que faguèt de las transliterations de tèxtes auvernhats en escritura occitana classica “adaptada”, e partiguèt de l’IEO 63 en seguida de nombrosas disputas violentas.