CAPÇALERA PAIS INVISIBLE

Actualitats

Politica
crotz-tolosaCreated with Sketch.LengadòcLengadòc Bas

Macron es pas benvengut en Bas Lengadòc

De manifestants emmaliciats per la reforma de las retiradas e lo biais de l’impausar an increpat pertot lo president francés

Environ 600 policièrs bloquèron l’intrada de Gange e enebiguèron las caçairòlas. Pasmens, lo recampament de protèsta foguèt nombrós
Environ 600 policièrs bloquèron l’intrada de Gange e enebiguèron las caçairòlas. Pasmens, lo recampament de protèsta foguèt nombrós | @attac_fr

Tèxte legit

Aculhença glaciala del president francés, Emmanuel Macron, dins sa vesita oficiala ièr en Bas Lengadòc. Macron foguèt increpat a Gange (Cevena Lengadociana), ont vesitèt un collègi. Coma pertot, los manifestants li demandèron lo retirament la reforma de las retiradas impausada fa gaire d’un biais fòrça impopular.

Puèi, lo president foguèt tanplan semonsat quand arribèt a Lunèl (Costièra de Nimes), a Besièrs, a Bedarius (Espinosa) e Montpelhièr. Los sindicats del departament d’Erau, qu’organizèron las manifestacions de refús del cap de l’estat francés, avián promés “d’organizar lo combat fins al retirament d’aquela contrareforma de las retiradas”.

 

Increpat en Alsàcia

 

Macron arribèt en Lengadòc après una vesita pas plasenta en Alsàcia. A Schlettstadt (Alsàcia) foguèt escridassat per un grop de manifestants. “Es pas lo primièr còp qu’ausissi lo mond se plànher de ieu”, çò diguèt, davant los manifestants que cridavan. Tot aquò foguèt seguit per de centenas de camèras de television qu’o enregistrèron tot. Puèi diguèt als jornalistas que se podiá pas convèncer “lo mond qu’escotan pas”.

Dimars, mai de tres cents manifestants s’acampèron a Saint-Denis per exprimir lor refús de Macron, quand assistissiá a un concèrt a l’Ostal d’Educacion de la Legion d’Onor. Ja la setmana passada, pendent un viatge oficial als Païses Basses, subiguèt qualques interrupcions.

Diluns, dins son parladís a la television agachat per mai de quinze milions d’espectators e acompanhat de caceiroladas per carrièras, Macron reconeguèt que la reforma de las retiradas aviá causat de malèsser, mas tornèt dire qu’èra necita, segon el.

 

 

 

 

 

 

 

 

 

 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Loisa Miquèl Montmarte-de-Cevenas
2.

D'apondre tanben que la CGT Erau a blocada l'electricitat de l'aeropòrt de Montpelhièr e del colègi ont èra aculhit (a degut faire son blabladís dins la cort).
Tanben, agachatz la bandièra bèla "GARDAREM" al fons a gaucha de la fotò.

  • 6
  • 0
Franc Bardòu
1.

Un elegit neoliberal (generalament elegit sense conviccion majoritària, mas, lo mai clar del temps, en oposicion reaccionala a un autre elegit neoliberal o per contrar, plan comprenesiblament, un caludc d'ultradreita) agís deliberadament contra l'intrès collectiu, dins l'interès plan pensat d'un ponherat d'individús (çò pro caractyeristic, totun, d'unes poders fascistas de l'istòria recenta). Cossí un pòble per çò mendre esclairat non poiriá pas recebrer un tal "elegit" coma un molon de fem ?

Aquel malcontentament, aquela colèra totun, non tròba cap de mejan de 'esprimir al delà de l'art mai o mens collectiu de romegar, cremar bordilhas e esbrigalhar veirinas mai o mens publicitàrias. Perqué ? Per una rason plan simpla : satisfasent o non, un elegit non es jamai qu'un elegit local, mentre que la causa primièra e fondamentala del malcontentament, ela, es mondiala. E los ciutadans, malcontents o non, non an cap de mejan d'accion (de sostyen ni d'oposicion) contra un sistèmi internacional, en l'occuréncia financiarista ultraliberal.

Un elegit ultraliberal o sap fòrt plan : lo sistèmi que contribuís a instaurar lo despassa e lo conten, coma subèrna d'un flume. Dins un contèxte aital, las democracia son, per parafrasar lo grand Max Felip Delavouët, coma de "reis mòrts qu'anavan a la decisa". Qué far per i cambiar realament, efectivament, l'anar d'aqueste flume, cap a de rics sempre mai rics, e de paures sempre mai paures, sempre mai assignats a l'isolament social e a la precaritat ? Calrdiá poder agir a l'escalon internacional ; per ara, cap de solucion "electoralista" non sembla paréisser a l'asuèlh politic de las democracias malautas e aflaquidas.

  • 8
  • 1

Escriu un comentari sus aqueste article