Aitor Montes Lasarte es un mètge de familha de la vila d’Aramaio, ont lo 90% dels abitants parlan abitualament lo basco, lenga qu’el emplega normalament dins sos rapòrts medicals. Dempuèi un an, a notat qu’un anestesista sonat Sergio Schillaci, de l’espital Alto Deba de la vila d’Arraste, accedís a sos dorsièrs medicals e li daissa de messatges intimidatòris: “S’asiratz l’espanhòl escrivètz vòstres rapòrts en anglés mas empleguetz pas lo basco”. Montes Lasarte ramenta que l’accès a l’istòria medicala d’una persona es un delicte e que los messatges daissats per Schillaci contenon d’intimidacion e de difamacion que l’acusan “de téner en òdi l’espanhòl”. A mai, lo mètge basco exigís lo sosten de la direccion de l’espital e que s’especifique per escrich qu’a drech d’emplegar lo basco dins sos rapòrts medicals, e a anonciat una cauma de la fam a partir del 28 d’abril s’aquelas doas demandas capitan pas.

En mai d’aquò, Montes Lasarte se planh que Schillaci aja pas subit cap de consequéncia. “Se çò que s’es passat o aguèsse fach una infirmièra contra un mètge se seriá ja dobèrt un dorsièr, mas es un òme e amb una especialitat espitalièra coma l’anestesia e es fòrça protegit”, çò precisa. Tanben Montes vòl far remarcar que la situacion de la lenga basca es marrida dins lo mitan sanitari: “I a cada còp mai de professionals bascofòns, mas la majoritat son de joves infirmièrs, n’i a pas gaire demest los mètges especializats e fòrça mens demest los caps de servici”.

Lo sindicat ESK exigiguèt dijòus de la direccion de l’espital que s’enquistèsse suls actes de l’anestesista, qu’a ja causat diferentas situacions conflictivas amb lo personal de l’espital.

Ièr dissabte, i aguèt de manifestacions de sosten a Montes e a l’usatge de la lenga basca dins los servicis de la santat a Vitòria, Bilbao e Sant Sebastian.